ئەسعەد شەیبانی: برا کوردەکانمان پایەکی ڕاستەقینەی ناسنامەی سووریان

ئاڤا نیوز

ئەسعەد شەیبانی، وەزیری دەرەوەی سووریا پەیامێکی بە زمانی کوردی بە شێوەزاری کرمانجی بڵاو کردەوە و تێیدا دووپاتی کردەوە، کورد پێکهاتەیەکی ڕاستەقینەی گەلی سووریان.

چیرۆکی سەرەکی: ئەمشەو، ئەحمەد شەرع مەرسوومێکی بە واژۆی خۆی دەرکرد و تێیدا دان بە بەشێکی ماف و داواکارییەکانی کوردی سووریا دەنێت لەوانەش؛ خوێندن بە کوردی و بە فەرمی ناساندنی زمانی کوردی و جەژنی نەورۆز وەک پشوویەکی نیشتمانی دەناسرێت.

بڵاوکراوەی فەرمی: دوابەدوای مەرسوومەکەی ئەحمەد شەرع، سەرۆکی کاتی سووریا تایبەت بە مافەکانی کورد، شەیبانی لە تۆڕی ئێکس پەیامێکی بە زمانی عەرەبی و کوردی بڵاو کردەوە و جەختی لەسەر یەکپارچەیی خاکی وڵاتەکەی و یەکگرتنی گەلی سووریا کردەوە.

ئەسعەد شەیبانی ڕایگەیاند: ناسنامەی سووریا هەمیشە کۆکەرەوەی هەموو ڕۆڵەکانیەتی و برا کوردەکان پایەیەکی ڕاستەقینەن لەمبارەیەوە، ئەوان لە ئێمەن و ئێمەش لە ئەوانین و داهاتوومان یەکە و دابەشنەکراوە، هێزی سووریا لە یەکگرتنی گەلەکەی دایە و بە یەکگرتنمان ڕووبەڕووی ئاستەنگەکان دەبینەوە بۆ ئەوەی وڵاتێکی ئازاد ئاوەدان بکەین کە جێگەی هەموو خەون و ئاواتەکانمانی تێیدا ببێتەوە.