بەهۆی سەرمای زستانەوە ژیانی ملیۆنێک ئاوارە و پەنابەر لە هەرێمی کوردستان لە مەترسیدایە

ئاڤا نیوز

ناوەندی هەماهەنگیی قەیرانەکان (JCC) هۆشداری دەدات کە نزیکەی یەک ملیۆن ئاوارە و پەنابەر لە هەرێمی کوردستاندا لە دۆخێکی مرۆیی سەختدا زستان بەڕێ دەکەن، لە کاتێکدا حکومەتی فیدراڵ تەواوی بەرپرسیارێتییەکانی فەرامۆش کردووە.

وێنە گەورەکە: پشتیوانییە نێودەوڵەتییەکان بۆ ئاوارەکان لە عێراق بەرەو کەمبوونەوە چوون، ئەمەش بارگرانییەکی دارایی و لۆجستیی یەکجار قورسی خستووەتە سەر شانی حکومەتی هەرێمی کوردستان. بەغدا نەک هەر پڕۆسەی گەڕانەوەی ئاوارەکانی بۆ ناوچەکانیان ئاسان نەکردووە، بەڵکو تەنانەت پێداویستییە سەرەتاییەکانی سووتەمەنی و گەرمکردنەوەشی بۆ دابین نەکردوون.

بۆچی گرنگە: زۆربەی ئەم ئاوارە و پەنابەرانە هاووڵاتیی عێراقین، بەڵام حکومەتی ناوەندی مامەڵەی "هاووڵاتیی پلە دوو"یان لەگەڵ دەکات. فەرامۆشکردنی ئەم ژمارە زۆرەی خەڵک لە وەرزی سەرمادا، ئەگەری سەرهەڵدانی کارەساتی مرۆیی و بڵاوبوونەوەی نەخۆشی لە ناو کەمپەکاندا زیاد دەکات.

ئەوەی پێویستە بیزانیت: بەغدا تەنانەت یەک لیتر نەوتی بۆ ئاوارەکان نەناردووە و ئەرکەکەی بۆ هەرێم و دەزگای خێرخوازیی بارزانی جێهێشتووە، جێبەجێنەکردنی "ڕێککەوتننامەی شنگال" و خراپیی دۆخی ئەمنی، ڕێگرە لە گەڕانەوەی 300 هەزار ئاوارەی ئەو قەزایە، هاوکات نەبوونی بەڵگەنامەی فەرمی و ململانێ عەشایەرییەکان لە ناوچە ڕزگارکراوەکان، هەزاران ئاوارەی لە کەمپەکانی خازر و حەسەن شام هێشتووەتەوە.

لێدوانی فەرمی: سروە ڕەسوڵ، بەڕێوەبەری گشتیی ناوەندی هەماهەنگیی قەیرانەکان بە ئاڤای ڕاگەیاند: بەغدا هیچ هاوکارییەکی بۆ ئاوارەکان ڕەوانە نەکردووە. لە کاتێکدا ئەمانە هاووڵاتیی عێراقین، بەڵام تەنانەت پێداویستیی زستانەشیان بۆ دابین ناکەن. ئێستا ئەرکی خزمەتگوزارییەکان تەنیا لەسەر شانی حکومەتی هەرێم و دەزگای خێرخوازیی بارزانی ماوەتەوە.

زانیاریی زیاتر: هەرێمی کوردستان میوانداریی نزیکەی 40%ـی کۆی ئاوارەکانی عێراق دەکات. بەهۆی کەمبوونەوەی بودجەی ڕێکخراوە نێودەوڵەتییەکان، خزمەتگوزارییە تەندروستی و پەروەردەییەکان لە ناو کەمپەکاندا بەرەو پەککەوتن دەچن، ئەمەش وای کردووە ژیان تێیاندا قورستر بێت.