هەسەدە: حکومەتی سووریا ڕێککەوتنی کشانەوەی لە ڕۆژهەڵاتی حەلەب پێشێل کرد

ئاڤا نیوز

هێزەکانی سووریای دیموکرات (هەسەدە) حکومەتی دیمەشق بە پێشێلکردنی ڕێککەوتنی نێودەوڵەتیی کشانەوە لە شارەکانی دێر حافر و مەسکەنە تۆمەتبار دەکات و داوای دەستوەردانی بەپەلەی وڵاتانی چاودێر دەکات.

ڕاگەیێنراوی فەرمی: ناوەندی ڕاگەیاندنی هەسەدە لە ڕاگەیێنراوێکدا، دەڵێت: بەپێی ڕێککەوتنەکە بڕیار وابوو سوپای سووریا پاش تەواوبوونی کشانەوەی هێزەکانیان بچێتە ناو ئەو ناوچانە، بەڵام دیمەشق پێشوەختە و پێش تەواوبوونی پڕۆسەکە هێزەکانی بردووەتە ناو هەردوو شارەکە، کە ئەمەش مەترسییەکی گەورە دروست دەکات.

٠ هەسەدە جەخت دەکاتەوە کە ئەم جووڵەیەی سوپای سووریا دەرئەنجامی خراپی دەبێت، بۆیە داوا لە هێزە نێودەوڵەتییەکان دەکات فشار بخەنە سەر دیمەشق بۆ پابەندبوون بە بڕگەکانی ڕێککەوتنەکە و ڕێگریکردن لە تێکچوونی دۆخەکە.

ئەوەی پێویستە بیزانیت: ئەم پێشهاتە لە کاتێکدایە کە سوپا ڕایگەیاندبوو کۆنترۆڵی ئەو ناوچانەی کردووە، بەڵام هەسەدە دەڵێت هێشتا پڕۆسەی کشانەوەی شەڕڤانان بە تەواوی کۆتایی نەهاتبوو کە سوپا بەزاندوویەتی و چووەتە ناو جەرگەی ناوچەکانی نێوان هەردوولا.

لەلایەکی دیکەوە: دەستەی ئۆپەراسیۆنەکانی سوپای عەرەبیی سووریا ڕایگەیاند، ڕێگە بە چوونە دەرەوەی زیاتر لە 200 ئەندامی هێزەکانی سووریای دیموکرات (هەسەدە) دراوە تاوەکو بە چەکەکانیانەوە لە ناوچەکە بکشێنەوە.