پێکدادان لە مەسکەنە؛ هەسەدە دیمەشق بە پێشێلکردنی ڕێککەوتنی کشانەوە تۆمەتبار دەکات

ئاڤا نیوز

شاری مەسکەنە لە ڕۆژهەڵاتی حەلەب پێکدادانی سەربازیی نێوان هێزەکانی سووریای دیموکرات (هەسەدە) و سوپای سووریای بەخۆیەوە بینی، ئەوەش پاش ئەوەی هەسەدە دیمەشقی بە پێشێلکردنی بڕگەکانی ڕێککەوتنی نێودەوڵەتیی کشانەوە تۆمەتبار کرد.

ڕاگەیێنراوی فەرمی: ناوەندی ڕاگەیاندنی هەسەدە ڕایگەیاند، وەستاندنی شەڕ پەیوەستە بە پابەندبوونی تەواوی دیمەشق بە ڕێککەوتنەکە، تاوەکو پڕۆسەی کشانەوەی شەڕڤانان لە مەسکەنە و دێر حافر بە سەلامەتی کۆتایی دێت.

٠ هەسەدە دەڵێت سوپای سووریا پێش تەواوبوونی وادەی کشانەوە هێزەکانی بردووەتە ناو ناوچەکە، کە ئەمەش مەترسییەکی گەورەی دروست کردووە.

ئەوەی پێویستە بیزانیت: ئەم ئاڵۆزییە لە کاتێکدایە کە بڕیارە لە هەولێر کۆبوونەوەیەک لە نێوان مەزڵووم عەبدی، فەرماندەی گشتی هێزەکانی سووریای دیموکرات "هەسەدە" و تۆم باراک، نێردەی تایبەتی سووریا بۆ ڕێگری لە پێکدادان بکرێت، بەڵام پێشێلکارییەکانی دیمەشق ئاسۆی گفتوگۆکانی تەڵخ کردووە.