سوپای عەرەبیی سووریا ناوچەکانی ڕۆژئاوای فوراتی بە ناوچەی سەربازیی داخراو ڕاگەیاند

ئاڤا نیوز

دەستەی ئۆپەراسیۆنەکانی سوپای سووریا، تەواوی ناوچەکانی ڕۆژئاوای فوراتی بە ناوچەی سەربازیی داخراو ڕاگەیاند، ئەوەش پاش ئەوەی هێزەکانی حکومەت لە کاتی جێبەجێکردنی ڕێککەوتنی کشانەوەدا ڕووبەڕووی هێرش بوونەتەوە.

ڕاگەیێنراوی فەرمی: سوپای عەرەبی سووریا هێزە چەکدارەکانی سەر بە پەکەکەی بە ئەنجامدانی ئەو هێرشانە تۆمەتبار کردووە و جەختی کردووەتەوە کە ڕێکاری تووندی سەربازی لەو ناوچانە دەگرنەبەر و ڕێگە بە هیچ جووڵەیەکی چەکداری نایاسایی نادەن.

زانیاریی زیاتر: بەپێی نەخشەیەکی فەرمیی کە وەزارەتی بەرگریی سووریا بڵاویکردووەتەوە، ناوچەکانی نێوان تەبقا و مەعدان بە ڕەنگی سوور وەک ناوچەی سەربازیی مەترسیدار نیشان دراون، هاوکات ناوچەکانی دێر حافر و مەسکەنە وەک ناوچەی پارێزراو دیاری کراون.

ئەوەی پێویستە بیزانیت: سوپای عەرەبیی سووریا هۆشداریی بەپەلەی داوەتە هاووڵاتییانی مەدەنی کە دەستبەجێ لە مۆڵگەکانی هەسەدە و پاشماوەکانی ڕژێمی پێشوو دووربکەونەوە تاوەکو لە مەترسییەکانی بۆردوومان و پێکدادانی زەمینی پارێزراو بن.

ئەمەش بزانە: ئەم پەرەسەندنە مەترسیدارە دوای پێکدادانەکانی ئەمڕۆی مەسکەنە دێت، کە تێیدا هەردوولا یەکتری بە "ستەمکردن" و پێشێلکردنی ڕێککەوتنەکە تۆمەتبار دەکەن.