وەزارەتی بازرگانی دەرگای بۆ کۆمپانیاکانی لۆجستیک واڵا دەکات

ئاڤا نیوز

وەزارەتی بازرگانی و پیشەسازیی هەرێمی کوردستان بڕیاریدا ئاسانکاریی تەواو بۆ دامەزراندنی کۆمپانیاکانی لۆجستیک و گواستنەوە بکات؛ ئەم هەنگاوە وەک مەرجێکی بنەڕەتی بۆ خێراکردنی گەشەی ئابووری و ڕاکێشانی وەبەرهێنانی بیانی دەبینرێت.

وێنە گەورەکە: لۆجستیک بڕبڕەی پشتی هەر ئابوورییەکی مۆدێرنە. حکومەتی هەرێمی کوردستان دەیەوێت لە ڕێگەی دیجیتاڵکردنی کەرتی گواستنەوەوە، کوردستان بکاتە ناوەندێکی بازرگانیی نێودەوڵەتی. ئامانجەکە ئەوەیە کە چیتر لۆجستیک تەنیا گواستنەوەی کاڵا نەبێت، بەڵکو ببێتە پیشەسازییەکی زیرەک کە بتوانێت کێبڕکێی بازاڕە جیهانییەکان بکات.

بۆچی گرنگە: بەبێ سیستەمێکی لۆجستیکیی پێشکەوتوو، چالاکییە بازرگانییەکان پەکدەکەون. کاراکردنی ئەم کەرتە تێچووی هاوردە و هەناردە کەمدەکاتەوە، کاتی گەیشتنی کاڵا خێرا دەکات و دەرفەتی کار بۆ سەدان گەنج لە کەرتی تایبەتدا دەڕەخسێنێت، ئەمەش ئاسایشی خۆراک و کاڵا لە هەرێمی کوردستان بەهێزتر دەکات.

چیرۆکی سەرەکی: وەزارەتی بازرگانی چەند ڕێکارێکی نوێی بۆ هاندانی ئەم کەرتە ڕاگەیاندووە کە هەر وەبەرهێنەرێک بییەوێت کۆمپانیای لۆجستیک دابمەزرێنێت، تەنیا لە ماوەی 48 کاژێردا مۆڵەتی فەرمیی بۆ دەردەکرێت، هاوکات وەزارەت جەخت لەسەر پاڵپشتیی ئەو پڕۆژانە دەکات کە تەکنەلۆژیای نوێ لە گواستنەوەدا بەکاردەهێنن.

زانیاریی زیاتر: بۆ یەکەمجار لە هەولێر پێشانگایەکی گەورەی لۆجستیک کرایەوە، کە تێیدا 125 کۆمپانیای ناوخۆیی و 12 وڵاتی جیهان بەشدارییان تێدا کرد.

لێدوانی فەرمی: سەروەر کەمال هاواری، بریکاری وەزارەتی بازرگانی و پیشەسازی بە ئاڤای ڕاگەیاند: هیچ چالاکییەکی ئابووری بەبێ گواستنەوەی دیجیتاڵی سەرکەوتوو نابێت. ئێمە هەموو ئاسانکارییەک بۆ ئەو کۆمپانیایانە دەکەین کە دەیانەوێت لە بواری لۆجستیکدا کار بکەن، چونکە ئەمە کلیلی هاندانی وەبەرهێنان و گەشەی ئابووریی کوردستانە.