ئیلهام ئەحمەد حکومەتی سووریا بە پێشێلکردنی ڕێککەوتنی مەسکەنە تۆمەتبار دەکات

ئاڤا نیوز

بەرپرسی پەیوەندییەکانی دەرەوەی بەڕێوەبەرایەتیی خۆسەری ڕۆژئاوای کوردستان ڕایدەگەیێنێت، حکومەتی کاتیی سووریا بەرپرسیاری یەکەمە لە پێشێلکردنی ڕێککەوتنی نێودەوڵەتیی کشانەوە و ئەنجامدانی هێرش بۆ سەر شەڕڤانان.

چیرۆکی سەرەکی: دوێنی شەممە شاندی هێزەکانی هاوپەیمانی نێودەوڵەتی بە سەرۆکایەتی ئەمریکا لەگەڵ شاندی هەسەدە لە دێر حافر کۆبوونەوە، دوای کۆبوونەوەکە فەرماندەیی گشتی هەسەدە بڕیاری دا هێزەکانیان لە دێر حافر و مەسکەنە بکشێننەوە.

بڵاوکراوەی فەرمی: ئیلهام ئەحمەد، لە هەژماری فەرمیی خۆی لە تۆڕی کۆمەڵایەتیی "ئێکس" دەڵێت: "هێزەکانی سووریای دیموکرات (هەسەدە) دوێنێ ڕەزامەندییان لەسەر کشانەوە لە ناوچەکانی ڕۆژئاوای فورات نیشانداوە، بەڵام گرووپە چەکدارەکانی سەر بە دیمەشق بە شێوەیەکی ئاشکرا ڕێککەوتنەکەیان بەزاندووە و پێکدادانی تووند لە مەسکەنە بەردەوامە."

ئەوەی پێویستە بیزانیت: پێشتر هەسەدە ڕایگەیاندبوو، وەستاندنی شەڕ پەیوەستە بە پابەندبوونی تەواوی دیمەشق بە بڕگەکانی ڕێککەوتنەکە تاوەکو کاتی تەواوبوونی پڕۆسەی دووبارە جێگیرکردنەوەی شەڕڤانان.

زانیاریی زیاتر: هەسەدە جەختی لەسەر ئەوە کردووتەوە، بەپێی ڕێککەوتنەکە دەبوو 48 کاتژمێر مۆڵەتیان پێ بدرێت بۆ کشانەوە لە دێر حافر و مەسکەنە، بەڵام سوپای سووریا پێش تەواوبوونی ئەو وادەیە هێرشی کردووەتە سەریان.

داواکاری فەرمی: بەرپرسی پەیوەندییەکانی دەرەوە داوای لە هێزە نێودەوڵەتییە چاودێرەکان کرد دەستبەجێ دەستوەردان بکەن بۆ ڕێگریکردن لە خراپتربوونی بارودۆخەکە و گەرەنتی پاراستنی گیانی شەڕڤانان بکرێت.