سیستانی و سەدر ڕازی بوون نووری مالیکی ببێتەوە سەرۆکوەزیرانی عێراق

ئاڤا نیوز

 

بەگوێرەی زانیاریی میدیاکانی عێراق ئایەتوڵڵا عەلی سیستانی، مەرجەعی باڵای شیعەکان و موقتەدا سەدر، ڕێبەری ڕەوتی شیعە ڕازی بوون نووری مالکی ببێتەوە بە سەرۆکوەزیرانی داهاتووی عێراق.

وێنە گەورەکە: لە چەند رۆژی ڕابردوودا، کاتێک محەممەد شیاع سوودانی و نووری مالیکی، سەرۆکی هاوپەیمانێتیی دەوڵەتی یاسا لەسەر پۆستی سەرۆکوەزیران ڕێککەوتن و سوودانی لە بەرژەوەندیی مالیکی کشایەوە، دەوڵەتی یاسا ترسێکی هەبوو کە مەرجەعیەتی نەجەف و سەدر ڕازی نەبن.

زانیاریی بەدەستهاتوو: بەپێی هەندێک زانیاریی میدیاکانی عێراق، هەردووکیان، مەرجەعەیەتیش و موقەتدا سەدریش ڕازی بوون بە کاندیدکردنی نووری مالیکی بۆ پۆستی سەرۆکوەزیرانی داهاتووی عێراق؛ لەناو چوارچێوەی هەماهەنگیشدا، زۆربەی لایەنەکان ڕازی بوون، بەڵام عەمار حەکیم و قەیس خەزعەلی ڕازی نەبوون، ئێستا دوای ڕازی بوونی سیستانی و موقتەدا سەدر ئەوانیش لارییان نەماوە.

ئەوەی پێشىینی دەکرێت: چاوەڕوان دەکرێت لە چەند کاتژمێری داهاتوودا، چوارچێوەی هەماهەنگی بەفەرمی کاندیدبوونی نووری مالیکی بۆ پۆستی سەرۆکوەزیرانی داهاتووی عێراق ڕابگەیێنێت.

زۆربەی لایەنە شیعییەکان و ئێرانیش پێیان وایە، بەهۆی ئەو دۆخەی کە ڕۆژهەڵاتی ناوەڕاست پێدا تێپەڕ دەبێت، دەبێت سەرۆکوەزیرانی داهاتووی عێراق، کەسێکی بەهێز بێت، بۆیە نووری مالکییان بۆ ئەو پۆستە و بۆ ئەم قۆناغە پێ باشە.

ئەمەش بزانە: نووری مالیکی پەیوەندیشی باشە لەگەڵ ئەمریکییەکان و هەم لەگەڵ ئێرانیش. بە گوتەی سەرکردەکانی چووارچێوەی هەماهەنگی، نووری مالیکی، سەرۆکوەزیرانی داهاتووی عێراقە.