ئەمریکا داوا لە سووریا دەکات هێرشە سەربازییەکانی لە حەلەب و تەبقا ڕابگرێت

ئاڤا نیوز

براد کوپەر، فەرماندەی فەرماندەیی ناوەندیی هێزەکانی ئەمریکا (سێنتکۆم) داوای لە حکومەتی سووریا کرد کۆتایی بە هەموو جۆرە هێرش و کردەوەیەکی سەربازی بهێنن لە ناوچەکانی نێوان حەلەب و تەبقا.

 

وێنە گەورەکە: ڕۆژی هەینی هێزەکانی هاوپەیمانان و مەزڵووم عەبدی، فەرماندەی گشتیی هێزەکانی سووریای دیموکرات ڕێککەوتن هەسەدە لە ناوچەکانی دێر حافر و مەسکەنە و دەوروبەریان بکشێتەوە. ئەمڕۆ هەسەدە بەگوێرەی ڕێککەوتنەکە کشایەوە و سوپای عەرەبیی سووریا هەردوو شارۆچکەکەی کۆنترۆڵ کرد، بەڵام سوپای سووریا پێشڕەوی کرد بەرەو شارۆچکەی تەبقا کە دەکەوێتە ڕۆژئاوای فورات و شەڕ ڕووی دا.

 

ڕاگەیێنراوی فەرمی: فەرماندەی فەرماندەیی ناوەندیی سێنتکۆم ڕایگەیاند، "پێشوازی لەو هەوڵە بەردەوامانە دەکەین کە لەلایەن هەموو لایەنەکانەوە لە سووریا دەدرێن بۆ ڕێگریکردن لە پەرەسەندنی ئاڵۆزییەکان و دۆزینەوەی چارەسەر لە ڕێگەی گفتوگۆوە.

 

زانیاریی زیاتر: فەرماندەی سێنتکۆم بە دیاریکراوی داوای لە هێزەکانی حکومەتی سووریا کرد، کۆتایی بە هەموو جۆرە هێرش و کردەوەیەکی سەربازی بهێنن لە ناوچەکانی نێوان حەلەب و تەبقە.

 

سەبارەت بە پرسی بەرەنگاربوونەوەی تێرۆر، فەرماندەی سێنتکۆم گوتی: بەردەوامبوون لە فشارەکان بۆ سەر گروپی داعش، پێویستی بە هەماهەنگی و کاری پێکەوەیی هەیە لە نێوان هاوبەشە ناوخۆییەکانی سووریا و هێزەکانی ئەمریکا و هاوپەیمانان.

 

- بوونی سووریایەکی ئارام کە لەگەڵ خۆی و وڵاتانی دراوسێیدا لە ئاشتیدا بێت، مەرجێکی بنەڕەتی و سەرەکییە بۆ چەسپاندنی ئاشتی و سەقامگیری لە تەواوی ناوچەکەدا.