سوپای عێراق بنکەی عەین ئەسەدی وەرگرتەوە

ئاڤا نیوز

وەزارەتی بەرگریی عێراق کشانەوەی تەواوی هێزەکانی ئەمریکای لە بنکەی سەربازیی عەین ئەسەد لە پارێزگای ئەنبار ڕاگەیاند و سوپای عێراق چووە ناو بنکەکە.

 

ڕاگەیێنراوی فەرمی: وەزارەتی بەرگریی عێراق لە ڕاگەیێنراوێکدا ئاشکرای کرد، ئەمڕۆ شەممە 17ی 1ی 2026، لیوا عەبدولئەمیر یاروڵلا، سەرۆکی ئەرکانی سوپا، سەرپەرشتیی دابەشکردنی ئەرکەکانی بەسەر یەکە جیاوازەکان و پێکهاتە سەربازییەکانی لە بنکەی عەین ئەسەد کرد کە دوای کشانەوەی هێزەکانی ئەمریکا و سوپا بە تەواوی سەربازگەکە بەڕێوە دەبات.

 

- جگە لە هێزی زەمینی، فەرماندەیی هێزی ئاسمانی و فڕۆکەوانیی سوپای عێراق لە بنکەکە جێگیر کراون.

 

ئەمەش بزانە: بنکەی عەین ئەسەد یەکێکە لە گەورەترین و گرنگترین بنکە سەربازییەکانی عێراق و دەکەوێتە پارێزگای ئەنبار لە ڕۆژئاوای ئەو وڵاتە. لە ساڵی هەشتاکانی سەدەی ڕابردوو دروستکراوە و لە دوای ساڵی 2003 بنکەیەکی سەرەکیی هێزەکانی ئەمریکا و هاوپەیمانی نێودەوڵەتی بووە و دواتریش و لە ساڵی 2014ـەوە بنکەکە هێزەکانی هاوپەیمانیی نێودەوڵەتیی دژی داعش تێیدا جێگیر بوو بوون.

 

-ئەو بنکەیە ڕۆڵی سەرەکی هەبووە لە ئۆپەراسیۆنە سەربازییەکانی دژ بە داعش, هاوکات وەک ناوەندێکی مەشق و ڕاهێنان بۆ هێزە عێراقییەکان و ناوەندێکی هەماهەنگی بۆ ئۆپەراسیۆنە ئاسمانییەکان کاری کردووە.

 

باکگراوند: هەفتەی ڕابردوو، سەرچاوەیەکی ئەمنی بە ئاڤا میدیای ڕاگەیاند: هێزەکانی ئەمریکا زۆرینەی کەلوپەل و ئامێرەکانیان گواستووەتەوە و دەستیان کردووە بە هەڵوەشاندنەوەی بنکە، هۆڵ، ئامێرەکان و سیستمی چاودێری و بردوویانن بۆ بنکەی تەنەف لە سووریا.

 

- بەشێکی زۆری ڕاوێژکار و ئەفسەرە باڵاکان کشاونەتەوە بەرەو بنکەی تەنەف لە سووریا و بنکەی هەریر لە هەولێر، سەرچاوەکە ئەو کات ڕایگەیاند لە چەند ڕۆژی کەمی داهاتوو بنکەکە بە تەواوی لە هێزە بیانییەکان چۆڵ دەبێت.