ماکرۆن بۆ سووریا: ناتوانین پشتگیری لە بەردەوامیی ئەم شێوازە لە مامەڵەکردن بکەین لەگەڵتان

ئاڤا نیوز

 

ئیمانوێل ماکرۆن، سەرۆکی فەرەنسا هۆشداری تووند دەداتە حکومەتی سووریا و دەڵێت: پێویستە دەسەڵاتدارانی سووریا دەستبەجێ هێرشە سەربازییەکانیان ڕابگرن، چونکە فەرەنسا و ئەوروپا ناتوانن پشتگیری لە بەردەوامیی ئەم شێوازە لە مامەڵەکردن بکەن.

 

وێنە گەورەکە: ڕۆژی هەینی هێزەکانی هاوپەیمانان و مەزڵووم عەبدی، فەرماندەی گشتیی هێزەکانی سووریای دیموکرات ڕێککەوتن هەسەدە لە ناوچەکانی دێر حافر و مەسکەنە و دەوروبەریان بکشێتەوە. ئەمڕۆ هەسەدە بەگوێرەی ڕێککەوتنەکە کشایەوە و سوپای عەرەبیی سووریا هەردوو شارۆچکەکەی کۆنترۆڵ کرد، بەڵام سوپای سووریا پێشڕەوی کرد بەرەو شارۆچکەی تەبقا کە دەکەوێتە ڕۆژئاوای فورات و شەڕ ڕووی دا.

 

لێدوانی فەرمی: ئیمانوێل ماکرۆن، سەرۆکی فەرەنسا لە پەیامێکی نوێدا سەبارەت بە دۆخی سووریا ڕایگەیاند، هێنانەکایەی سووریایەکی یەکگرتوو و سەقامگیر تەنیا لە ڕێگەی تێکەڵکردنی هێزەکانی سووریای دیموکرات (هەسەدە) لەناو دەوڵەتدا دەبێت، نەک لە ڕێگەی بەرپاکردنی شەڕ دژی ئەو هێزانەی کە شانبەشانی هاوپەیمانان شەڕی داعشیان کردووە.

 

- پێویستە دەسەڵاتدارانی سووریا دەستبەجێ هێرشە سەربازییەکانیان ڕابگرن. فەرەنسا و ئەوروپا ناتوانن پشتگیری لە بەردەوامیی ئەم شێوازە لە مامەڵەکردن بکەن. گەیشتن بە ڕێککەوتنێکی گشتگیر و سیاسی کارێکی گونجاو و پێویستە.

 

- سەرۆکی فەرەنسا ئاماژەی بە مەرسوومە سەرۆکایەتییەکەی دوێنێی ئەحمەد شەرع کرد کرد کە تایبەت بوو بە مافەکانی کورد و بە هەنگاوێکی گرنگ و لەسەر ڕێچکەیەکی ڕاستی وەسف کرد.

 

- ئێمە وەک وڵاتێکی دۆستی گەلی سووریا، بەردەوام دەبین لە پشتیوانیکردنی پرۆسەی گفتوگۆ بە ئامانجی پاراستنی یەکپارچەیی خاکی سووریا و گەڕانەوەی ئاشتی بۆ ئەو وڵاتە.