گرفتی وەزارەتی بازرگانی کوردستان و عێراق ڕەوانەی ئەنجوومەنی وەزیران دەکرێت

ئاڤا نیوز

وەزارەتی بازرگانیی هەرێمی کوردستان، نووسراوێکی ئاراستەی ئەنجوومەنی وەزیرانی هەرێمی کوردستان کردووە، بۆ ئەوەی ڕێگا چارەیەک پێشنیاز بکرێت، بۆ چارەسەرکردنی گرفتی  نێوانیان لەگەڵ وەزارەتی بازرگانی عێراق.

چیرۆکی سەرەکی: وەزارەتی بازرگانی عێراق داوای 118 ملیار دینار دەکات، کە گوایە پارەی هاووڵاتیان بووە و لە بەرامبەر پێدانی بەشەخۆراک لە ساڵانی 2004 تاوەکو 2022 وەرگیراوە بینێردرێتەوە بۆ بەغدا، ئەمەش وایکرد دابەشکردنی بەشە خۆراکی هەشتەم ڕابگیرێت، کۆتایی هەفتەی داهاتوو پرۆسەکە دەستپێکرایەوە، بەڵام ئاگاداریی وەزارەتی بازرگانی هەرێمی کوردستان کراوەتەوە کە پێش دابەشکردنی بەشە خۆراکی داهاتوو کێشەکە چارەسەر بکەن.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی، بە ئاڤای گوت: چاوەڕێی وەڵامی ئەنجوومەنی وەزیرانین بۆ ئەوەی بڕیار بدرێت، یان ئەو بڕە پارەیەی داواکراوە بینێرین یان لیژنەی چاودێری دارایی هەولێر و بەغدا وردبینی بکەن و پاکتاوی ئەو بڕە پارەیە بکرێت.

زانیاریی زیاتر: وەزارەتی بازرگانی هەرێمی کوردستان ئاماژە بەوەدەدات کە ئەو 118 ملیارە لە گواستنەوە و کۆگاکردنی خۆراک، نەسریەی مانگانەی فەرمانگەکان خەرجکراوە، وەزارەتی بازرگانی عێراقیش پێی وایە ئەو پارەیە هی هاووڵاتیانە لەبەرامبەر پێدانی بەشە خۆراک و دەبێت بنێردرێتەوە، ئەگەر کێشەکە چارەسەر نەکرێت دووبارە گرفت بۆ دابەشکردنی بەشە خۆراک دروست دەبێت.