خەڵکی گرینلاند بۆ ترەمپ: نامانەوێت ببین بە ئەمریکی

ئاڤا نیوز

 

بەرەبەیانیی ئەمڕۆ یەکشەممە هەزاران کەس لە پایتەختی گرینلاند دژی هەڵوێستەکانی ئەمریکا و هەڕەشەکانی دۆناڵد تڕەمپ بۆ سەر ئەوروپا و گرینلاند، دەستیان بە خۆپیشاندان کرد.

وێنە گەورەکە: شەوی ڕابردوو دۆناڵد تڕەمپ، سەرۆکی ئەمریکا هەڕەشەی لە وڵاتانی ئەوروپا کرد و ڕایگەیاند: ئەگەر گرینلاند ڕادەستی ئەمریکا نەکەن، ئەوا بە ڕێژەی 10٪ باج دەخاتە سەر ئەوروپا. 

 

زانیاریی زیاتر: خۆپیشاندەران، لە شاری نووکی پایتەختی گرینلاند کۆبوونەوە و بە چەندین دروشم ناڕەزایەتی خۆیان دەربڕی، بەشێكی زۆر لە خۆپیشاندەران کڵاوێکی سوریان هاوشێوەی کڵاوەکەی تڕەمپ لەسەر کردبوو و لێیان نووسیبوو ''وابکەن ئەمریکا بچێتە دەرەوە''. 

- لەنێو خۆپیشاندەرانەیش، جێنس فێدریک نێلسن، سەرۆکوەزیرانی گرینلاند ئامادە بوو و دژ بە سیاسەتەکانی ئەمریکا هاواری دەکرد.

گرینلاندییەکان، هاواریان دەکرد ''نامانەوێت ببین بە ئەمریکی'' ئەوەش لە کاتێکدایە کە دۆناڵد تڕەمپ هەوڵەکانی بۆ وەرگرتنی دورگەکەی جەمسەری باکوور چڕتر کردووە و دوای لە دانیمارک کردووە گرینلاند بە ئەمریکا بفرۆشن. 

باکگراوند: دۆناڵد ترەمپ بەردەوام پێداگری لەسەر بەدەستهێنانی گرینلاند دەکاتەوە. ئەو پێی وایە بۆ ئاسایشی نیشتمانیی ئەمریکا گرنگە. چەند جارێکیش گوتویەتی: ئەگەر ئەمریکا گرینلاد نەخاتە ژێر ڕکێفی خۆی؛ ڕووسیا و چین ئەو کارە دەکەن. هاوکات ڕەتیشی ناکاتەوە کە ئەگەر هەیە بە بەکارهێنانی هێز ئەو دوورگەیە بەدەستبهێنێت.