ئێستا چی لە سووریا دەگوزەرێت؟

ئاڤا نیوز

 

ئاژانسی ڕۆیتەرز بڵاوی کردەوە، بەنداوی فورات، فڕۆکەخانەی تەبقا، کێڵگەی نەوتی عومەر  و کێڵگەی غازی کۆنیکۆ کەوتنە دەست سوپای عەرەبیی سووریا.

چیرۆکی سەرەکی: بەیانیی ئەمڕۆ یەکشەممە خێڵە عەرەبییەکانی پارێزگای دێرەزوور لە هەسەدە هەڵگەڕانەوە و دەستیانگرت بەسەر کێڵگە نەوتی و غازییەکانی ئەو پارێزگایە. ئێستا سوپای عەرەبیی سووریا دەستی بە هێرش کردووە بۆ سەر بەنداوی تشرین و پێکدادان لەگەڵ هەسەدە بەردەوامە.

 

ڕاگەیێنراوی فەرمی: ناوەندی ڕاگەیاندنی هێزەکانی سووریای دیموکرات (هەسەدە) بڵاوی کردەوە. لە بەرەبەیانیی ئەمڕۆ 18 کانوونی دووەمی 2026ـەوە، ڕووبەڕووی زنجیرەیەک هێرشی گرووپە چەکدارەکانی سەر بە سوپای عەرەبی سووریا بوونەتەوە و پێکدادانی تووند لە چەندین شارۆچکەی دێرزوور و ڕەققە ڕووی داوە و پێکدادانەکانیش لە چەندین شوێن بەردەوامن.

 

- دوای پێکدادانی تووند لە شارۆچکەکانی گرانج، ئەبوو حەمام، ئەلکەشکییە، زێبان و تەیانە لە دێرەزوور، هێزەکانی هەسەدە دەستیان بە کشانەوە لە ڕۆژهەڵاتی دێرەزوور کرد، هەروەها لە مەنسووڕەش شەڕڤانان بەرپەرچی هێرشی چەکدارەکانیان داوەتەوە و تاوەکو ئێستاش شەڕ بەردەوامە.

 

لەلایەکی دیکەوە: پارێزگای دێرزوور بڕیاری دا ئەمڕۆ یەکشەممە، دەوامی فەرمی لە سەرجەم فەرمانگە و دامەزراوە حکومییەکان ڕابگرێت و داوای لە هاووڵاتییان کرد لە پێناو سەلامەتییان لە ماڵەکانیان بمێننەوە.

 

ئەوەی ئێستا ڕوودەدات: سەرچاوەیەکی سەربازیی سووریا ڕایگەیاند، هێزەکانی حکومەت کۆنتڕۆڵی شاری "شوحێل"ـیان لە گوندەواری دێرزوور کردووە.

 

- لەبارەی هێرشەکەی بەنداوی تشرین دەڵێت: شەڕی دژوار لە نزیک بەنداوەکە بەردەوامە و سێ تانکی هێزەکانی سووپای عەرەبیی سووریا تێکشکێنراون.

 

- کۆمپانیای نەوتی سووریا ڕایگەیاند، هێزەکانی سوپا کۆنتڕۆڵی سەرجەم کێڵگە نەوتی و غازییەکانی پارێزگای دێرەزووریان کردووە، لەنێویاندا کێڵگەی ستراتیژیی "عومەر" و کێڵگەی غازی "کۆنیکۆ".

 

- ئاژانسی ڕۆیتەرز بڵاوی کردەوە، بەنداوی فورات، فڕۆکەخانەی تەبقا، کێڵگەی نەوتی عومەر  و کێڵگەی غازی کۆنیکۆ کەوتنە دەست سوپای عەرەبیی سووریا.

 

- بەڕێوەبەری ناوەندی ڕاگەیاندنی هێزەکانی سووریای دیموکرات (هەسەدە) ڕایدەگەیێنێت، حکومەتی کاتیی سووریا بە هاوکاریی گرووپە چەکدارەکانی تورکیا و داعش، هێرشێکی بەرفراوانیان بە بەشداریی زیاتر لە 100 هەزار چەکدار بۆ سەر ناوچەکانی باکوور و ڕۆژهەڵاتی سووریا دەستپێکردووە.

 

- وەزارەتی نەوتی سووریا دەڵێت: هەریەکە لە کێڵگەکانی "تەنەک، جەفرە، عەزبە، تەیانە، جێدۆ، مالح و ئەزرەق" لە ڕۆژهەڵاتی دێرەزوور کەوتوونەتە ژێر دەسەڵاتی سوپای سووریا.

 

داواکاری؛ بەڕێوەبەرایەتی خۆسەر لە ڕاگەیێنراوێکی فەرمی ڕایگەیاندووە: گرووپە چەکدارەکانی سەر بە دیمەشق ڕێککەوتنەکانیان پێشێل کردووە و لە چەندین قۆڵەوە هێرشیان دەستپێکردووە و تا ئێستاش بەردەوامە. لەم قۆناغەدا چەکهەڵگرتنی گشتی ڕادەگەیەنن. دیمەشق سوورە لەسەر پەرەدانی زیاتر بە بارگرژی سەربازی و ئامانجیانە برایەتی نێوان پێکهاتەکان تێکبدەن و توندوتیژی و ناکۆکی دروست بکەن.

 

ئەوەی پیویستە بیزانیت: ئەم پێشهاتانە هاوکاتن لەگەڵ کشانەوەی فراوانی هەسەدە لە ڕۆژهەڵاتی دێرەزوور بە مەبەستی دووبارە جێگیرکردنەوەی هێزەکانیان، کە وای کردووە زۆربەی دامەزراوە ستراتیژییەکان و کێڵگە نەوتییەکان بکەونە ژێر دەسەڵاتی هێزەکانی سەر بە سوپای عەرەبیی سووریا.

 

بە تەنیشت ئەم بابەتەوە: ئیمانوێل ماکرۆن، سەرۆکی فەرەنسا هۆشداری دایە حکومەتی سووریا و دەڵێت: پێویستە دەسەڵاتدارانی سووریا دەستبەجێ هێرشە سەربازییەکانیان ڕابگرن، چونکە فەرەنسا و ئەوروپا ناتوانن پشتگیری لە بەردەوامیی ئەم شێوازە لە مامەڵەکردن بکەن.