مەزڵووم عەبدی داوای پاڵپشتی جەماوەری دەکات

ئاڤا نیوز

فەرماندەی گشتیی هەسەدە ڕایدەگەیەنێت، سەرەڕای بەردەوامیی هێرشەکان، هەوڵە نێودەوڵەتییەکان بۆ ئارامکردنەوەی دۆخی سووریا بەردەوامن و داوای پاڵپشتیی لە هاووڵاتییان دەکات بۆ ڕووبەڕووبوونەوەی گرژییەکان.

لێدوانی فەرمی: مەزڵووم عەبدی، فەرماندەی گشتیی هێزەکانی سووریای دیموکرات ڕایگەیاند: "هەوڵەکانی ئارامکردنەوەی دۆخەکە بە نێوەندگێڕیی نێودەوڵەتیی بەردەوامن، سەرەڕای بەردەوامیی هێرشەکان، داوای پاڵپشتیی جەماوەریی دەکەم لە بەرامبەر هەڵکشانی گرژییەکان لە باکووری ڕۆژهەڵاتی سووریا".

زانیاریی زیاتر: مەزڵووم عەبدی لەگەڵ تۆم باراک، نێردەی تایبەتی ئەمریکا بۆ سووریا، لە ئێستادا لە شاری دیمەشقن بە مەبەستی کۆبوونەوەی لووتکە لەگەڵ ئەحمەد شەرع، سەرۆکی نوێی سووریا. ئەم سەردانە کە بە نێوەندگێڕیی ڕاستەوخۆی واشنتن ئەنجام دەدرێت، ئامانج لێی تاوتوێکردنی دوایین پێشهاتە سیاسیی و ئەمنییەکانی باکوور و ڕۆژهەڵاتی سووریا و داڕشتنی نەخشەڕێگەیەکە بۆ تێپەڕاندنی قەیرانەکان، لەکاتێکدا کە هێرشە مەیدانییەکان هێشتا وەک فشارێکی سەربازیی لەسەر زەوی ماونەتەوە و هەسەدە دەیەوێت لەرێگەی ئەم دیپلۆماسییەتە و پاڵپشتیی خەڵکەوە ڕێگریی لە هەر پاشەکشەیەک بکات.