هەولێر کارگەیەکی مۆدێرنی ڕیسایکلین دادەمەزرێنێت

ئاڤا نیوز

شارەوانیی هەولێر ئامادەکاریی دەکات بۆ دامەزراندنی کارگەیەکی مۆدێرنی ڕیسایکلینی خۆڵ و خاشاک لە ناوچەی کانی قرژاڵە، ئەوەش بە ئامانجی چارەسەرکردنی کێشەی ژینگەیی و کەمکردنەوەی تێچووی ملیارەها دیناری کۆکردنەوەی زبڵ.

لێدوانی فەرمی: کارزان عەبدولهادی، سەرۆکی شارەوانییەکانی هەولێر بە ئاڤای ڕاگەیاند: "چەند شوێنێک بۆ کارگەکە دیاریکراوە و ئێستا چاوەڕێی ڕەزامەندیی کۆتایی وەزارەتی شارەوانیی دەکەین بۆ ئەوەی ڕێکارەکانی دیکەی بوونیادنانی کارگەکە دەستپێبکەین".

زانیاریی زیاتر: ڕۆژانە بڕی 1,800 تۆن زبڵ و خاشاک لە سنووری شارەوانییەکانی هەولێر کۆدەکرێتەوە و لە ساڵی 2025دا کۆی گشتیی ئەو بڕە گەیشتووەتە 684,000 تۆن، کە ئەمەش تێچوویەکی دارایی یەکجار زۆری لەسەر حکومەت دروستکردووە. پڕۆسەی کۆکردنەوەی خاشاک لەلایەن 6 کۆمپانیای جیاوازەوە بە هاوکاریی زیاتر لە 1,000 ژینگەپارێز بەڕێوەدەچێت، کە مانگانە بڕی 1.5 ملیار دیناری بۆ تەرخان دەکرێت و ساڵانە نزیکەی 18 ملیار دینار دەدرێت بەو کۆمپانیایانە بۆ ئەو مەبەستە.

- کارگەی نوێی ڕیسایکلین بە سێ شێوازی مۆدێرن مامەڵە لەگەڵ خاشاک دەکات، بە جۆرێک بەشێکی دەسووتێنرێت بۆ بەرهەمهێنانی وزە، بەشێکی بۆ دووبارە بەکارهێنانەوە جیا دەکرێتەوە و تەنها ئەو بەشەی کە سوودی نییە ژێرخاک دەکرێت، کە ئەمەش یارمەتیدەرێکی گەورە دەبێت بۆ پاککردنەوەی ژینگە و دووبارە بەکارهێنانەوەی شتومەکە بەکارهێنراوەکان.

ئەوەی پێویستە بیزانیت: دامەزراندنی ئەم کارگەیە هەنگاوێکی کردەییە بۆ گۆڕینی سیستەمی کۆنی ژێرخاککردنی زبڵ بۆ سیستەمێکی تەکنەلۆژیی پێشکەوتوو، کە تێیدا پاشماوەکان دەبنە سەرچاوەی داهات و وزە لە جیاتی ئەوەی ببنە هۆی پیسبوونی ژینگە و خەرجییەکی زۆر بۆ حکومەت.

باکگراوند: ساڵانێکی زۆرە خاشاکی هەولێر لە ناوچەی کانی قرژاڵە بە شێوەی کۆن ژێرخاک دەکرێت، کە ئەمە هەمیشە نیگەرانیی ژینگەیی لای دانیشتووانی ناوچەکە دروستکردووە؛ ئێستا حکومەتی هەرێمی کوردستان دەیەوێت لەرێگەی کەرتی تایبەت و وەبەرهێنانەوە ئەم دۆسێیە بە یەکجاریی و بە شێوەیەکی زانستیی چارەسەر بکات.