لە بەنزینخانەیەکی هەولێر لە بری نەوت؛ بەنزین دراوە بە هاووڵاتیان

ئاڤا نیوز

بەهۆی هەڵەی کارمەندێکەوە لە بەنزینخانەی "گەل" لە هەولێر، لەبری نەوتی سپی بەنزین بەسەر چەند خێزانێکدا دابەش کرا و لێکۆڵێنەوە لە ڕووداوەکە دەستیپێکردووە.

لێدوانی فەرمی: سالار محەممەد، لێپڕسراوی بەشی پشکنین لە بەڕێوەبەرایەتیی نەوت و کانزاکانی هەولێر بە ئاڤای ڕاگەیاند: "لە بەنزینخانەی گەل، بەنزینیان بۆ هاتووە و کارمەندەکە وایزانیوە نەوتە، هەر بۆیە بەسەر هاووڵاتییاندا دابەشی کردووە. تاوەکو ئێستا 11 خێزان لەبری نەوت بەنزینیان پێدراوە و لێکۆڵێنەوەش بۆ سزادانی کەمتەرخەمان بەردەوامە".

زانیاریی زیاتر: پڕۆسەی دابەشکردنی نەوتی سپی لە سەنتەری شاری هەولێر بەردەوامە و حکومەت بڕی 7,500,000 لیتر نەوتی بۆ ئەم مەبەستە ئامادە کردووە، هەر خێزانێک بڕی 100 لیتر نەوت بە نرخی 31,000 دینار وەردەگرێت.

ئەوەی پێویستە بیزانیت: هاووڵاتییان دەبێت پێش بەکارهێنانی ئەو سووتەمەنییەی لە بەنزینخانەکان وەریانگرتووە دڵنیا ببنەوە، چونکە لایەنی پەیوەندیدار جەخت دەکاتەوە کە لێکۆڵێنەوەی ورد دەکرێت و هەر لایەنێک لەم کارەدا کەمتەرخەم بێت، ڕووبەڕووی سزای یاسایی توند دەکرێتەوە.