هۆشدارییەک لە وەزارەتی کشتوکاڵەوە بۆ جووتیاران

ئاڤا نیوز

وەزارەتی کشتوکاڵ داوا لە هەموو جووتیاران دەکات تاوەکو 1-3-2026 پڕۆسەی بایۆمەتری تەواو بکەن و هەژماری بانکیی بکەنەوە بۆ ئەوەی لە وەرگرتنی شایستە داراییەکانیان بێبەش نەبن.

ڕاگەیێنراوی فەرمی: وەزارەتی کشتوکاڵ و سەرچاوەکانی ئاوی هەرێمی کوردستان ڕایگەیاند: "لە چوارچێوەی ئامادەکارییەکان بۆ ڕێکخستنەوەی پلانی داچاندنی زستانە، بەتایبەتی گەنمی ساڵی 2025-2026، پێویستە هەموو جووتیارێک پابەندی پڕۆسەی بایۆمەتری بێت و ڕێکارەکانی کردنەوەی هەژماری بانکیی ئەنجام بدات".

زانیاریی زیاتر: پڕۆسەی تۆمارکردن و کۆکردنەوەی زانیارییەکان لەسەر ئاستی تەواوی هەرێمی کوردستان دەستیپێکردووە و لەرێگەی بەڕێوەبەرایەتیی گشتیی پلاندانان و بەهەماهەنگیی فەرمانگە کشتوکاڵییەکانی پارێزگاکان، ئیدارە سەربەخۆکان و بەڕێوەبەرایەتییە گشتییەکانی کشتوکاڵ بەڕێوەدەچێت.

٠ جووتیاران پێویستە دوو فۆرمی سەرەکیی کە تایبەتن بە تۆمارکردنی ناوی جووتیار و زانیارییەکانی هەژماری بانکیی پڕبکەنەوە، چونکە ئەم ڕێکارە نوێیە دەبێتە بنەمایەک بۆ چارەسەرکردنی کێشەکانی گواستنەوەی دانەوێڵە و ئاسانکاریی لە وەرگرتنی شایستە داراییەکان لەرێگەی سیستمی بانکییەوە.

ئەوەی پێویستە بیزانیت: هەر جووتیارێک تاوەکو وادەی دیاریکراو کە 1-3-2026ـە خۆی تۆمار نەکات، ڕووبەڕووی کێشە دەبێتەوە لە وەرگرتنی شایستە داراییەکانی و ناتوانێت سوودمەند بێت لە پلانی داچاندنی گەنمی ئەم وەرزە، چونکە سیستمەکە تەنها مامەڵە لەگەڵ ئەو کەسانە دەکات کە خاوەن هەژماری بانکیی و کۆدی بایۆمەتریین.