سێنتکۆم سیستەمێکی پێشکەوتووی دژەدرۆن بۆ پاراستنی هێزەکانی ئەمریکا دەخاتە کار

ئاڤا نیوز

ئەمریکا سیستەمێکی نوێی پێشکەوتوو بۆ هێزەکانی دەخاتەکار کە بۆ تێکشکاندنی هەڕەشەی درۆنەکان پەرەی پێدراوە.

چیرۆکی سەرەکی: فەرماندەیی ناوەندیی هێزەکانی ئەمریکا (سێنتکۆم)، سیستەمێکی نوێی مووشەکی بە ناوی "EAGLS" (سیستەمی ئەلیکترۆنیی پێشکەوتووی هاوێژەری زەمینی) بەکاردەهێنێت، کە بە تایبەت بۆ تێکشکاندنی هەڕەشەی درۆنەکان پەرەی پێدراوە.

سیستەمەکە خاوەنی سەکۆیەکی هاوێشتنی موشەکی 70 ملیمەترییە و تەکنەلۆژیای ڕێنماییکردنی لایزەری تێدا بەکارهاتووە. سیستەمەکە پشت بە موشەکەکانی "APKWS" دەبەستێت کە بە سیستەمێکی وردی پێشکەوتوو ئامانجەکانی دەپێکێت.

ڕاگەیێنراوی فەرمی: بە گوێرەی ڕاگەیێنراوێکی سێنتکۆم، سیستەمی "EAGLS" تەنیا بۆ پێکانی ئامانجەکانی بە وردی دیزاین نەکراوە، بەڵکو سیستەمێکی گونجاوە دەکرێت لەگەڵ بارودۆخی جیاوازدا بگونجێنرێت و لە ڕووی تێچووشەوە نرخەکەی زۆر نییە. ئامانجی سەرەکی ئەم تەکنەلۆژیایە پاراستنی سەربازانی ئەمریکایە لە بەرامبەر ئەو هێرشە درۆنییە نوێیانەی کە دەکرێنە سەر بنکە و بارەگاکانیان لە ناوچەی بەرپرسیارێتی سێنتکۆم.

ئەوەی پێویستە بیزانیت: ئەم هەنگاوەی سوپای ئەمریکا لە کاتێکدایە کە بەکارهێنانی درۆن لە ململانێکانی ناوچەکەدا ڕووی لە زیادبوون کردووە و واشنتن دەیەوێت لە ڕێگەی ئەم جۆرە سیستمە بەرگریانەوە، بە کەمترین تێچوو و زۆرترین وردی، ڕێگری لەو هەڕەشانە بکات کە لەسەر هێزەکانی لە ناوچەکەدا دروست دەبن.