میدیایەکی ئیسرائیل: نەتانیاهۆ و سوپا تاوتوێی هێرشکردنە سەر ئێران دەکەن

ئاڤا نیوز

 

بەرپرسانی باڵای ئیسرائیل ڕایانگەیاند، ئەگەری هەڵگیرسانی جەنگ و پێکدادانی سەربازی لەگەڵ ئێران هێشتا لە ئارادایە و بەدوور نازانرێت، بۆ ئەو مەبەستە هەموو ئامادەسازییەکیان کردووە.

 

وێنە گەورەکە: کەناڵی 13ی ئیسرائیل، ئاشکرای کردووە، سوپای ئیسرائیل ئامادەکارییەکانی چڕکردووەتەوە و بنیامین نەتانیاهۆ، سەرۆک وەزیرانی ئیسرائیل، کۆبوونەوەیەکی تایبەتی لەگەڵ بەرپرسانی دەزگا ئەمنییەکان ئەنجامداوە، بەمەبەستی تاوتوێکردنی پرسی هێرشکردنە سەر ئێران.

زانیاری زیاتر: کەناڵ 13ی ئیسرائیل ئەوەی خستووەتە ڕوو، لەگەڵ کۆبوونەوەکەی نەتانیاهۆ، ئییال زەمیر، سوپاسالاری ئیسرائیل، لەهەمان کاتدا لە بارەگای هێزی ئاسمانی کۆبوونەوەیەک بۆ تاوتوێکردنی سیناریۆکانی وەڵامدانەوەی ئیسرائیل لە کاتی هێرشی ئێران ڕێکخراوە.

 

هەر لەم چوارچێوەیەدا، سێ فڕۆکەی جەنگیی نوێی جۆری F-35ی ئەمریکی لە بنکەی نەفاتیمی ئیسرائیل نیشتنەوە و ڕادەستی هێزی ئاسمانی ئەو وڵاتە کران. 

 

ئەمەش بزانە: سەبارەت بە دەنگۆی کەمبوونەوەی موشەکی بەرگری، بەڕێوەبەری جێبەجێکاری پیشەسازیی فڕۆکەوانی ئیسرائیل بە کەناڵ 13ی ئیسرائیلی ڕاگەیاند، بڕی پێویست لە مووشەکییان بۆ بەرپەرچدانەوەی هەر هێرشێکی مووشەکی ئێران دەستەبەر کردووە.