ئیلهام ئەحمەد: دەنگۆی كۆمەڵكوژی لە حەسەكە دوورە لە ڕاستییەوە و بەتەواوی هەڵبەستراوە

ئاڤا نیوز

بەرپرسی پەیوەندییەکانی دەرەوەی ئیدارەی خۆسەر دەڵێت، "سەرجەم ئەو ڕاپۆرتانەی باس لە کۆمەڵکوژی لە حەسەکە دەکەن، دوورن لە ڕاستییەوە و بەتەواوی هەڵبەستراون". داواش لە هاووڵاتیان دەكات، نەكەونە داوی دەنگۆكانەوە.

ئەوەی پێویستە بیزانیت: لەچوارچێوەی جێبەجێكردنی ڕێككەوتنە نوێیەكەی نێوان هەسەدە و دیمەشق بۆ ڕاگرتنی شەڕ لە سەرجەم بەرەكاندا، وەزارەتی بەرگریی سووریا، هێزەكانی سوپای ڕاسپارد، سەروماڵی هاووڵاتیان بپارێزن و ئامادەكاریش بكەن بۆ كردنەوەی ڕێڕەوێكی ئارام بەمەبەستی گەڕانەوەی دانیشتووان بۆ ناوچەكانی خۆیان.

لێدوانی فەرمی: ئیلهام ئەحمەد، بەرپرسی پەیوەندییەکانی دەرەوەی بەڕێوەبەرایەتیی خۆسەری باكوور و ڕۆژهەڵاتی سووریا لە هەژماری فەرمیی خۆی لە تۆڕی كۆمەڵایەتیی ئێكس ڕایگەیاند، "سەرجەم ئەو ڕاپۆرتانەی باس لە کۆمەڵکوژی لە حەسەکە دەکەن، دوورن لە ڕاستییەوە و بەتەواوی هەڵبەستراون."

ڕوونیشی كردووەتەوە، "ئەم چەواشەکارییانە لەلایەن گرووپە تووندڕەوەکانی هێزەکانی سوپای عەرەبی سووریا بڵاودەکرێنەوە، بە مەبەستی تێکدانی ئاگربەست و نانەوەی گرژیی عەشایەری و زەمینەسازی بۆ هێرشکردنە سەر حەسەکە و کۆبانێ. بۆیە داوا لە هاووڵاتیان دەكەم لەوپەڕی وریاییدا بن و نەكەونە داوی دەنگۆكان".

زانیاریی زیاتر: وتەبێژی ئیدارەی خۆسەر دووپاتیشی دەكاتەوە، ئەوان پابەندی ئاگربەستن و کار دەکەن بۆ یەکخستنی تەواوەتی هێزەکان لە حەسەکە.