پەرلەمانی عێراق تاوتوێی قەیرانی ئاو و وشکەساڵی دەکات

ئاڤا نیوز

پەرلەمانی عێراق کۆدەبێتەوە، گفتوگۆ لەبارەی کێشەکانی ئاو، وشکەساڵی و لێکەوتەکانی گۆڕانی کەشوهەوا دەکات، وەزیرانی دەرەوە و سەرچاوەکانی ئاوی عێراق لە دانیشتنەکە ئامادە دەبن.

چیرۆکی سەرەکی: فەرمانگەی ڕاگەیاندنی پەرلەمانی عێراق کارمانەی دانیشتنەکەی ئەمڕۆی بڵاوکردووەتەوە، بەپێی کارنامەکە، دانیشتنەکە تایبەتە بە تاوتوێکردنی دۆسیەی ئاو، هەریەک لە فوئاد حوسێن، وەزیری دەرەوەی عێراق و عەون زیاب عەبدوڵلا، وەزیری سەرچاوەکانی ئاو ئامادە دەبن بۆ خستنەڕووی دوایین پێشهاتەکانی دانوستان لەگەڵ تورکیا و ئێران و پلانەکانی حکومەت بۆ ڕووبەڕووبوونەوەی وشکەساڵی.

زانیاریی زیاتر: گۆڕانی کەشوهەوا لە عێراق تەنیا نەبووەتە هۆی بەرزکردنەوەی پلەکانی گەرما، بەڵکو کاریگەریی راستەوخۆشی لەسەر ڕێژەی بارانبارینیش دروستکردووە و لەماوەی پێنج ساڵی ڕابردوودا بە تێکڕا 15% کەمی کردووە، ئەوەش کاریگەریی راستەوخۆی کردووە لەسەر رووبەرە ئاوییەکان و کشتوکاڵ، بەوەش دیاردەی بە بیابانبوون و خۆڵبارینی فراوان کردووە ورێژەی خوێی لە خاک و دەرامەتە ئاوییەکاندا زیادکردووە.

 

ئەوەی پێویستە بیزانیت: ماوەی چەند ساڵێکە عێراق رووبەڕوویی قەیرانی ئاو بووەتەوە، ئەمەش دوای ئەوەی تورکیا لەسەر سەرچاوەکانی رووبارەکانی دیجلە و فورات چەندین بەنداویان بونیادنا کە گەورەترینیان بەنداوی ئەتاتورکە و دەکەوێتە سەر رووباری فورات، هەر لەو چوارچێوەیەدا گفتوگۆکانی نێوان عێراق و تورکیا ساڵانێکە بەردەوامە، کە مەبەست لێی بگەنە رێککەوتنێکی دوو قۆڵی لەبارەی پرسی ئاو، بەڵام تاوەکو ئێستا نەگەیشتوون بە رێککەوتن.