تا ئێستا پارتی و یەکێتی لەسەر کاندیدێکی هاوبەش بۆ پۆستی سەرۆککۆمار ڕێکنەکەوتوون

ئاڤا نیوز

بڕیارە کۆتایی ئەم مانگە لە دانیشتنێکی تایبەتدا؛ لە پەرلەمانی عێراق، سەرۆککۆمار هەڵبژێردرێت. پارتی و یەکێتی و لایەنە کوردستانییەکانی دیکە تا ئێستا لەسەر کاندیدێکی هاوبەش ڕێکنەکەوتوون.

ئەوەی پێویستە بیزانیت: لە دوایین کۆبوونەوەی شاندی دانوستانکاری پارتی و یەکێتی، هیچ بڕیارێک لە بارەی پێکهێنانی کابینەی نوێی حکومەتی هەرێمی کوردستان و یەکلاییکردنەوەی کاندیدێک بۆ پۆستی سەرۆککۆمای عێراق نەدرا.

لێدوانی فەرمی: حوسێن کەلاری، بەرپرسی لقی 22ـی گەرمیانی پارتی بە ئاڤای گوت، "تا ئەم ساتە لەگەڵ یەکێتی لەسەر هیچ کاندیدێکی هاوبەش ڕێکنەکەوتووین، ئێمە کاندیدی خۆمان هەیە، ئەوانیش کاندیدی خۆیان هەیە، مەرجی پارتی ئەوەیە پێش پڕۆسەی هەڵبژاردنی سەرۆککۆماری عێراق؛ پەرلەمانی کوردستان کارا بکرێتەوە ئینجا قسە لەسەر پۆستی سەرۆککۆمار دەکرێت."

گوتیشی، "دەرگای پارتی بۆ گفتوگۆ واڵایە، هەر لایەنێک بیەوێت بێتە پشتەوە، ئێمە ئامادەین گفتوگۆی لەگەڵ بکەین."

ئەوەی ئێستا ڕوودەدات: پرۆسەی وردبینکردنی ناوی کاندیدانی سەرۆککۆمار لەلایەنە پەیوەندارەکان گەڕاوەتەوە فەرمانگەی یاسایی پەرلەمانی عێراق و لە کۆی 81 کاندید 23 کاندید ماون کە 12یان جێگرکراون، نۆ کاندیدیان کوردن کە ئەمانەن:-

٠ نەوزاد هادی، کاندیدی پارتی
٠ فوئاد حوسێن، کاندیدی پارتی
٠ نزار ئامێدی، کاندیدی یەکێتی
٠ لەتیف ڕەشید، سەربەخۆ
٠ موسەننا ئەمین، کاندیدی ئۆپۆزسیۆنی کوردستان
٠ سەردار عەبدوڵڵا، سەربەخۆ.
٠ شوان داوودی، سەربەخۆ.
٠ عەبدوڵڵا عەلیاوەیی، سەربەخۆ.
٠ حوسێن تەها حەسەن سنجاری، سەربەخۆ.