عێراق سنوورەکانی لەگەڵ سووریا تووندتر دەکات

ئاڤا نیوز

فەرماندەیی ئۆپەراسیۆنە هاوبەشەکانی عێراق دەڵێت، بۆ پاراستنی سنوورەکان لەگەڵ وڵاتانی دراوسێ چەندین هێڵی بەرگری هەیە و سنوورەکانیش بە سیستەمێکی چاودێری ورد و ڕێکاری پێشکەوتوو پارێزراون، بۆیە سنوورەکان لە ئاسایشی تەواو دان.

وێنە گەورەکە: بەهۆی شەڕ و ئاڵۆزییەکانی دوو هەفتەی ڕابردووی سووریا، حکومەتی عێراق سنوورەکانی لەگەڵ ئەو وڵاتە بە سیستەمی چاودێری ورد و پێشکەوتوو  تووندوتۆڵتر دەکات.

لێدوانی فەرمی: سەعد مەعن، سەرۆکی شانەی ڕاگەیاندنی ئەمنیی لە فەرماندەیی ئۆپەراسیۆنە هاوبەشەکانی عێراق ڕایگەیاند، هێزەکانی پاسەوانی سنوور بە بەکارهێنانی سیستەمێکی چاودێری پێشکەوتوو و ڕێکاری نوێوە کارەکانیان بەردەوامن، ئەوەش بەجۆرێکە گەرەنتی بەرزترین ئاستی ئاسایش و ئارامی وڵات بەدرێژایی سنوورەکان دەکات.

ئاماژەی بەوەشکرد، چەندین هێڵی بەرگری لەلایەن سەرجەم هێزە ئەمنییەکان لە سنوورەکان دروستکراوە، ئەوەش نیشانەی ئامادەباشیی و هەماهەنگی بەردەوامە بۆ پاراستنی سنوورەکان.

لەلایەکی دیکەوە: ئەمڕۆ دەستەی حەشدی شەعبی بڵاویکردەوە، لیوای 25ـی حەشد لە ناوچە سنوورییە هەستیارەکانی نێوان ناوچەی تریفاوی - حەسەکە جێگیرکراوە، ئەویش بە ئامانجی هاوکاری هێزە ئەمنییەکانی دیکەی عێراق بە مەبەستی ڕێگری لە دزەکردنی "تیرۆرستان" و سنووردانان بۆ کاری تاوانکاریی، هەروەها ئامانجێکی دیکەی بڵاوەکردنی ئەو هێزە، بۆ پاراستنی سنوورەکان بەشێوەیەکی کاراتر.

بۆچی گرنگە: لەگەڵ هەموو گۆڕانکاریی و پێشهاتێک لە سووریا، عێراق ترسی ئەمنیی بۆ دروست دەبێت و جارێکی دیکە پێداچوونەوە بە پلانی پاراستنی سنوورەکاندا دەکاتەوە، هۆکارەکەشی بۆ پەیوەندی دوودڵی بەغدا لەگەڵ دەسەڵاتی نوێی دیمەشق دەگەڕێتەوە، کە پەیوەندییەکە زیاتر ئەمنیی و هەواڵگرییە و بۆ بوارەکانی تری هەماهەنگی نەگوازراوەتەوە.