ئەردۆغان پەیامێکی نوێ بۆ شەرع دەنێرێت و باسی کورد دەکات

ئاڤا نیوز

ڕەجەب تەیب ئەردۆغان، سەرۆککۆماری تورکیا، پیرۆزبایی سەرکەوتنی ئۆپەراسیۆنە سەربازییەکان لە ئەحمەد شەرع، سەرۆکی سووریا دەکات کە بە ڕێککەوتنی ئاگربەست و یەکخستنی هێزەکان کۆتایی هات.

لێدوانی فەرمی: ڕەجەب تەیب ئەردۆغان، سەرۆککۆماری تورکیا ڕایگەیاند: "پیرۆزباییم لە ئەحمەد شەرع کرد بۆ سەرکەوتنی ئۆپەراسیۆنەکەی کە بە وردییەکی هاوشێوەی نەشتەرگەریی بەڕێوە چوو تاوەکو زیان بە مەدەنییەکان نەگات؛ بنەمای 'یەک دەوڵەت و یەک سوپا' مەرجێکی بنەڕەتیی و حەتمییە بۆ سەقامگیریی لە هەر وڵاتێکدا و تورکیا پاڵپشتیی تەواوی هەر هەنگاوێک دەکات بۆ جێگیرکردنی ئەم بنەمایە".

زانیاریی زیاتر: ئەردۆغان لە پەیامەکەیدا جەختی لەوە کردەوە کە سووریا هی هەموو سوورییەکانە، بەبێ گوێدانە ناسنامەی نەتەوەیی و ئایینییان، جا کورد بن یان عەرەب، تورکمان بن یان مەسیحیی.

٠ سەرۆککۆماری تورکیا ئاماژەی بەوە کرد کە وڵاتەکەی وەک برایەکی کاتە سەختەکان، ڕێگە بە هیچ هەوڵێک نادات بۆ تێکدانی پڕۆسەی ئاشتیی و یەکپارچەیی خاکی سووریا.

٠ لە بەشێکی دیکەی قسەکانیدا باسی لەوە کرد کە تورکیا دژی هیچ مەزهەب و نەتەوەیەک نییە و مێژووی دەوڵەتەکانیان لە سەلجووقییەوە تاوەکو عوسمانیی و کۆماری ئێستای تورکیا، لەسەر بنەمای ڕەتکردنەوەی ڕەگەزپەرستیی بونیاد نراوە.

٠ هەروەها دووپاتی کردەوە کە ئەنقەرە لە شەڕی دژی تێرۆر و بەتایبەتی داعش لە تەنیشت دیمەشق دەوەستێت و چۆن دوێنێ گەلی سووریایان بەتەنیا جێنەهێشت، لەمەودواش لە ئاوەدانکردنەوە و چەسپاندنی ئارامییدا هاوکاریان دەبن تاوەکو کێشەکان لەسەر بنەمای برایەتیی و عەقڵانییەت چارەسەر بکرێن.

٠ ئەردۆغان بانگەشەی ئەوە دەکات ئۆپەراسیۆنەکەی سوپای عەرەبیی سووریا زۆر بە هەستیاریەوە ئەنجام دراوە و دەڵێت: سوپا لە تاقیکردنەوەیەکی زۆر گرنگ دەرچووە و کاری نابەجێیان ئەنجام نەداوە. بە کەمترین زیان ئۆپەراسیۆنەکە گەیشتە ئەنجام.


ئەوەی پێویستە بیزانیت: تورکیا بە فەرمیی پاڵپشتیی ڕێککەوتنی 14 خاڵیی نێوان دیمەشق و هەسەدە دەکات، بەتایبەتی ئەو خاڵانەی پەیوەستن بە کشانەوەی هێزە کوردییەکان بۆ ڕۆژهەڵاتی فورات و دەرکردنی ئەندامانی پارتی کرێکارانی کوردستان (PKK).