سبەی لە چەند ناوچەیەکی هەرێمی کوردستان پشووی فەرمییە

ئاڤا نیوز

پارێزگاکان و ئیدارە سەربەخۆکانی هەرێمی کوردستان، سبەی سێشەممە 20-01-2026ـیان لە سەرجەم ناوەندەکانی خوێندن کردە پشووی فەرمی، ئەوەش بەهۆی ئەو شەپۆلە بەهێزەی سەرما و سۆڵە و بەفروبارانەی ناوچەکەی گرتووەتەوە.

وێنە گەورەکە: ئەم بڕیارە هەنگاوێکی خۆپارێزیی نیشتمانییە بۆ دوورخستنەوەی مەترسی لەسەر تەندروستیی قوتابییان و خوێندکاران لە کاتی هاتوچۆدا؛ دابەزینی پلەکانی گەرما بۆ ژێر سفری سیلیزیی و دروستبوونی شەختە، ئاستەنگی گەورە بۆ هاتوچۆ دروست دەکات، بۆیە یەکخستنی بڕیاری پشوو لە زۆربەی شارەکان، ئاماژەیە بۆ هەستیاریی دۆخە ئەمنیی و ژینگەییەکە.

لێدوانی فەرمی: ئومێد خۆشناو، پارێزگاری هەولێر، ڕایگەیاند: "لەپێناو پاراستنی سەلامەتیی تەندروستیی قوتابییان، بڕیارماندا سبەی لە سەرجەم ناوەندەکانی خوێندنی حکومیی و ناحکومیی پشوو بێت.

" هاوكات بەڕێوەبەرایەتیی گشتیی پەروەردەی گەرمیان ئاماژەی بەوە کرد کە بەهۆی دابەزینی زۆری پلەکانی گەرما لە ناحیەی مەیدان و شێخ تەویل و گوندەکان، ناتوانرێت پڕۆسەی خوێندن بەردەوام بێت.

زانیاریی زیاتر: پشووەکە پارێزگاکانی هەولێر، دهۆک، سلێمانی و هەڵەبجە، لەگەڵ ئیدارە سەربەخۆکانی گەرمیان، سۆران، ڕاپەڕین و ناحیەی دینارتە دەگرێتەوە. ئەم بڕیارە دوای هەڵسەنگاندنی وردی پێشبینییەکانی بەڕێوەبەرایەتیی گشتیی کەشناسیی و بوومەلەرزەزانیی هەرێمی کوردستان دراوە، کە هۆشداریی لە شەپۆلێکی سەرما و سۆڵەی بەهێز دابوو.

ئەوەی پێویستە بیزانیت: داوا لە دایکان و باوکان دەکرێت ڕێکاری پێویست بۆ پاراستنی منداڵەکانیان لەم شەپۆلی بەستەڵەکە بگرنە بەر، بەتایبەت لەو ناوچانەی کە پلەی گەرما تێیاندا بە شێوەیەکی بەرچاو دادەبەزێت.

باکگراوند: هەرێمی کوردستان لە چەند ڕۆژی ڕابردوودا کەوتووەتە ژێر کاریگەریی نزمەپاڵەپەستۆیەکی جەمسەریی، کە لە هەندێک ناوچەی شاخاوی وەک حاجی ئۆمەران و پێنجوێن پلەکانی گەرما بۆ 16 پلەی ژێر سفر دابەزیوە و بەفرێکی زۆر باریوە.