مەسرور بارزانی ماڵی کوردستان لە داڤۆس دەکاتەوە

ئاڤا نیوز

سەرۆکوەزیران مەسرور بارزانی بۆ پێنجەمین ساڵ لەسەریەک "ماڵی کوردستان" لە کۆڕبەندی ئابووریی جیهانیی داڤۆس دەکاتەوە و سەرپەرشتیی شاندێکی گەورەی وەبەرهێنەرانی هەرێمی کوردستان دەکات.

لێدوانی فەرمی: محەممەد شوکری، سەرۆکی دەستەی وەبەرهێنانی هەرێمی کوردستان بە ئاڤای ڕاگەیاند: "ماڵی کوردستان ماڵی هەمووانە؛ ئەمساڵ 20 وەبەرهێنەری گەورەی کوردستان بەشدارن، کە بەراورد بە ساڵی ڕابردوو هەشت وەبەرهێنەر زیادیان کردووە."

زانیاریی زیاتر: سەرۆکوەزیران مەسرور بارزانی لە چوارچێوەی چالاکییەکانی ئەمساڵی داڤۆسدا، زنجیرەیەک کۆبوونەوەی چڕ و دیداری دیپلۆماسیی لەگەڵ سەرۆک، سەرکردە باڵاکان و خاوەنکارانی جیهانیی ئەنجام دەدات.

٠ تەوەرە سەرەکییەکانی گفتوگۆکانی بریتین لە خستنەڕووی دوایین گۆڕانکاریی و پێشهاتەکانی هەرێمی کوردستان و عێراق، تاوتوێکردنی دۆخی ئاسایشی ناوچەکە و دۆزینەوەی ڕێگەی نوێ بۆ ڕاکێشانی وەبەرهێنانی بیانی بە مەبەستی پەرەپێدانی ئابووریی کوردستان.

ئەوەی پێویستە بیزانیت: داڤۆس گەورەترین سەکۆی بڕیاردانی دارایی و سیاسییە لە جیهاندا و نزیکەی 3,000 سەرکردە لە 130 وڵاتەوە تێیدا کۆدەبنەوە. هەرێمی کوردستان دەیەوێت لەم دەرفەتە سوود لە ئەزموونە جیهانییەکان وەربگرێت و سیستمێکی ئابووریی مۆدێرن و ژینگەیەکی لەبار بۆ کۆمپانیا نێودەوڵەتییەکان لەناوخۆی هەرێمدا بڕەخسێنێت.

 

نوێ دەکرێتەوە...