حەلبووسی داوای کاندیدێکی قبووڵکراوی نیشتمانی بۆ سەرۆکایەتیی حکومەت دەکات

ئاڤا نیوز

 

لەکاتێکدا لایەنە شیعیەکانی عێراق نزیک بوونەتەوە لە ڕاگەیاندنی نوری مالیکی وەکو کانیدی پەسەندکراوی خۆیان بۆ پێکهێنانی کابینەی نوێی حکومەتی عێراق، محەممەد حەلبووسی، سەرۆکی حزبی تەقەدوم ڕایدەگەیێنێت، کاندیدی داهاتووی سەرۆکوەزیران دەبێت "قبووڵکردنی نیشتمانیی" هەموو پێکهاتەکانی عێراقی هەبێت، تاوەکو حکومەتێکی بەهێز پێکبهێنرێت.

 

لێدوانی فەرمی: حەلبووسی، لە پەیامێکدا لە هەژماری فەرمیی خۆی لە تۆڕی کۆمەڵایەتی "ئێکس" بە پێویستی دەزانێت سەرکردەکانی شیعە هەمان ئەو بایەخەی بە یەکڕیزیی چوارچێوەی هەماهەنگی دەدەن، بۆ یەکپارچەیی و تەبایی نێوان پێکهاتەکانی عێراقیشی بدەن، بە مەبەستی ڕێگریکردن لە گەڕانەوەی وڵات بۆ سەردەمی پشێوی و قەیرانەکان.

 

هۆشداریی: حەلبووسی کە سەرۆکی پێشووتری پەرلەمانی عێراق بوو هۆشداریی دا کە نابێت عێراق جارێکی دیکە بگەڕێتەوە بۆ ئەو ساڵە سەخت و پڕ لە تەنگژانەی کە هێشتا ئاسەوارەکانی لە مێشکی هاووڵاتییاندا ماون و چارەسەری کۆتاییان بۆ نەدۆزراوەتەوە.

 

حەلبووسی دووپاتی دەکاتەوە، ئایندەی عێراق پێویستی بە حکومەتێکە لەسەر بنەمای سازانی نیشتمانی بونیاد بنرێت، تاوەکو سەقامگیرییەکی هەمیشەیی بچەسپێت.

 

ئەوەی پێویستە بیزانیت: ئەم هەڵوێستەی حەلبووسی لە کاتێکدایە، سەرکردەکانی چوارچێوەی هەماهەنگی باس لە کاندیدکردنی نووری مالیکی بۆ پۆستی سەرۆکوەزیرانی داهاتووی عێراق دەکەن، بەڵام تاوەکو ئێستا بە فەرمی ڕانەگەیێنراوە.