باخچەلی: هەسەدە هەوڵی لەباربردنی پڕۆسەی ئاشتی دەدات

ئاڤا نیوز

دەوڵەت باخچەلی، سەرۆکی مەهەپە، هێزەکانی سووریای دیموکرات "هەسەدە" بە دژایەتیکردنی پڕۆسەی ئاشتی و لادان لە داواکارییەکانی ئۆجەلان تۆمەتبار دەکات و داوای نەمانیان لە تەواوی باکووری سووریا دەکات.

لێدوانی فەرمی: دەوڵەت باخچەلی، سەرۆکی پارتی بزووتنەوەی نەتەوەیی (مەهەپە) ڕایگەیاند: "هەسەدە بەردەوام هەوڵی داوە پڕۆسەی ئاشتی لەبار ببات و بە پێچەوانەی داواکارییەکانی ئۆجەلان جووڵاوەتەوە؛ ئێمە بە هیچ جۆرێک ڕێگە بە فیدراڵی و خۆڕێبەریی لە سووریا نادەین و پێویستە هەسەدە لە تەواوی ناوچەکانی قامیشلو و کۆبانی نەمێنێت".

زانیاریی زیاتر: باخچەلی لە کۆبوونەوەی فراکسیۆنی پارتەکەیدا خۆشحاڵیی خۆی بە هێرشەکانی سوپای سووریا بۆ سەر هەسەدە دەربڕی و جەختی لەوە کردەوە کە نابێت چیتر ڕێگە بدرێت "دەوڵەت لە ناو دەوڵەتدا" هەبێت.

٠ باخچەلی داوا دەکات هەسەدە نەک تەنها لە ڕۆژئاوای فورات، بەڵکو لە تەواوی ڕۆژهەڵاتی فوراتیش بکشێتەوە و کۆتایی بە هەموو چالاکییەکانی بهێنرێت، "دەبێت لە کۆبانێیەوە تاوەکو قامشلی کۆتایی بە چالاکییەکانیان بهێنرێت و لەو ناوچانە نەهێڵرێن".

٠ هاوکات وەک چارەسەریش، پێشنیازی دانانی دەستوورێکی نوێ دەکات کە وەک چەترێک هەموو پێکهاتە نەتەوەیی و ئایینییەکان (کورد، تورک و عەرەب) کۆبکاتەوە، بە مەرجێک هەموویان لەژێر سایەی یەک دەوڵەت و یەک سوپای نیشتمانییدا بن و هیچ لایەنێک پەراوێز نەخرێت.