کونسوڵخانەی ئەمریکا لە هەولێر: لە نزیکەوە چاودێریی خۆپیشاندانەکان دەکەین

ئاڤا نیوز

کونسوڵخانەی گشتیی ئەمریکا لە هەولێر ڕایگەیاند، بە وردیی چاودێریی ئەو بانگەوازانە دەکات کە بۆ ئەنجامدانی خۆپیشاندان لە هەولێر و شارەکانی دیکەی هەرێمی کوردستان بۆ ئەمڕۆ سێشەممە 20-01-2026 کراون.

ڕاگەیێنراوی فەرمی: کونسوڵخانەی ئەمریکا لە هەولێر لە ڕاگەیێنراوێکدا ئامۆژگاریی هاووڵاتییانی وڵاتەکەی دەکات: "چاودێریی میدیا ناوخۆییەکان بکەن و لە خۆپیشاندان و گردبوونەوە گەورەکان دوور بکەونەوە، چونکە ڕەنگە ببنە هۆی پەکخستنی هاتوچۆ و خزمەتگوزارییەکان؛ هاوکات ڕێنمایی گەشتیاریی بۆ عێراق لە ئاستی 4 (گەشت مەکە) ماوەتەوە."

زانیاریی زیاتر: وەزارەتی دەرەوەی ئەمریکا جەختی لەوە کردووەتەوە کە مەترسییەکانی تێرۆر، ڕفاندن، ململانێی چەکداریی و نائارامیی مەدەنیی هێشتا وەک هەڕەشەی جددیی ماونەتەوە. بەهۆی ئەم دۆخەوە، توانای نێردەی ئەمریکا لە عێراق بۆ پێشکەشکردنی هاوکاریی خێرا بە هاووڵاتییانی سنووردارە.

٠ داواش لە ئەمریکییەکان کراوە لە کاتی جووڵەیاندا لەناو شارەکاندا بە ئاگابن و پلانەکانی گەشتکردنیان بەپێی پێشهاتە ئەمنییەکان ڕێکبخەنەوە تاوەکو دووربن لەو ناوچانەی کە پێشبینی دەکرێت قەرەباڵغیی و ناڕەزایەتییان تێدا ئەنجام بدرێت، ئەمەش وەک ڕێکارێکی پارێزگاریی لە گیانی گەشتیاران و کارمەندانی نێردە دیپلۆماسییەکان هەژمار دەکرێت.

ئەوەی پێویستە بیزانیت: ئاستی 4ی گەشتکردن بەرزترین ئاستی هۆشدارییە و بە واتای ئەوە دێت کە حکومەتی ئەمریکا ناتوانێت گەرەنتیی پاراستنی هاووڵاتییانی بکات.