مەسرور بارزانی و سەرۆکی ئەرمەنستان لە داڤۆس کۆدەبنەوە

ئاڤا نیوز

مەسرور بارزانی، سەرۆکوەزیرانی هەرێمی کوردستان لە پەراوێزی کۆڕبەندی ئابووریی جیهان لەگەڵ ڤاهاگن خاچاتوریان، سەرۆککۆماری ئەرمەنستان کۆبووەوە و پەرەپێدانی پەیوەندییەکان و پاراستنی مافی پێکهاتەکانیان تاوتوێ کرد.

چیرۆکی سەرەکی: ئەمڕۆ سێشەممە 1/20، مەسرور بارزانی، سەرۆکی حکومەتی هەرێمی کوردستان، لە داڤۆس، لەگەڵ سەرۆک کۆماری ئەرمەنستان ڤاهاگن خاچاتوریان کۆبووەوە.

ڕاگەیێنراوی فەرمی: سەرۆکایەتیی حکومەتی هەرێمی کوردستان ڕایگەیاند: "لە دیدارەکەدا گفتوگۆ لەبارەی پەرەپێدانی پەیوەندیی دوولایەنە و دوایین گۆڕانکاریی و پێشهاتەکانی عێراق و ناوچەکە کرا؛ سەرۆکی ئەرمەنستان سوپاسی مەسرور بارزانی کرد بۆ پشتیوانیکردن و پاراستنی مافەکانی پێکهاتەی ئەرمەن لە هەرێمی کوردستان."

زانیاریی زیاتر: ڤاهاگن خاچاتوریان، سەرۆککۆماری ئەرمەنستان، بە فەرمیی مەسرور بارزانی بانگهێشت کرد بۆ سەردانکردنی یەریڤان تاوەکو لە نزیکەوە لەسەر ئاستە جیاوازەکان پەرە بە پەیوەندییەکانیان بدەن.

ئەمەش بزانە: لە بەشێکی دیکەی گفتوگۆکەدا، هەردوولا باسیان پێشهاتە سیاسییەکانی عێراق و ڕۆژهەڵاتی ناوەڕاستیان کرد و هاوڕا بوون لەسەر گرنگیی هەماهەنگیی بۆ پاراستنی ئارامیی ناوچەکە.