بە بەشداری 50 کۆمپانیای ناوخۆی 300 هەلی کار لە زانکۆی سەڵاحەددین دەڕەخسێنرێت

ئاڤا نیوز

زیاتر لە 50 کۆمپانیا و دامەزراوەی ناوخۆیی و بیانیی، زیاتر لە 300 هەلی کاریان بۆ قوتابییانی زانکۆی سەڵاحەددین ڕاگەیاندووە و بۆ ماوەی 2 ڕۆژ بەردەوام دەبێت.

لێدوانی فەرمی: سامان عەبدوڵڵا، بەڕێوەبەری ڕاگەیاندنی زانکۆی سەڵاحەددین بە ئاڤای ڕاگەیاند: "دەرفەتەکە بۆ ماوەی 2 ڕۆژە و قوتابییان دەتوانن ئەمڕۆ و سبەی ڕاستەوخۆ لەگەڵ کۆمپانیاکان قسە بکەن و دەرفەتی کار بۆ خۆیان بدۆزنەوە."

زانیاریی زیاتر: ئەم پێشانگایە لەلایەن سەنتەری پەرەپێدانی کار و كارسازی (CDC) زانکۆی سەڵاحەددین، بە هەماهەنگیی کاربەری "سوکاڵ" (Sukkal App) لەناو سەنتەری ڕۆشنبیریی و ئەکادیمیی زانکۆ ڕێکخراوە.

٠ جیا لەو 300 هەلی کارەی کە لەلایەن کۆمپانیاکانەوە خراونەتە ڕوو، بەرهەمی زیاتر لە 40 كارسازی گەنجیش نمایشکراون تاوەکو هانی قوتابییان بدەن بۆ دەستپێکردنی پڕۆژەی تایبەتی خۆیان. ئەم هەڵمەتە بەشێکە لە بەرنامەی ستراتیژیی حکومەتی هەرێمی کوردستان بۆ کەمکردنەوەی ڕێژەی بێکاریی و بەهێزکردنی ژێرخانی مرۆیی لەرێگەی ڕەخساندنی ژینگەیەکی لەبار بۆ کارکردن و داهێنان لەناو کەرتی تایبەتدا.

ئەوەی پێویستە بیزانیت: قوتابییان و دەرچووان دەتوانن بەبێ نێوەندگیر و بە شێوەیەکی ڕاستەوخۆ CVـیەکانیان پێشکەش بە نوێنەری کۆمپانیاکان بکەن.