لە باشوور و باکووری کوردستان بۆ پشتیوانی ڕۆژئاوای کوردستان خۆپیشاندانە

ئاڤا نیوز

 

لە  باکوور و باشووری کوردستان خۆپیشاندانی فراوان بۆ پشتیوانیی ڕۆژئاوای کوردستان دژی هێرشەکانی سوپای عەرەبی سووریا و چەکدارانی دیمەشق بەڕێوەدەچێت.

 

وێنە گەورەکە؛ تا دێت کاردانەوە و ناڕەزایەتییەکان دژ بە لەشکرکێشی و هێرشی دڕندانەی سوپای عەرەبیی سووریا و چەکدارانی دیمەشق بۆ سەر ڕۆژئاوای کوردستان لە فراوانبووندایە؛ لە باکووری کوردستان دەیان هەزار کەس لە نسێبین کە هاوسنوورە لەگەڵ قامیشلۆ دەیانەوێت سنوووری باکوور و ڕۆژئاوای کوردستان ببڕن و بچنە یارمەتی کوردانی ڕۆژئاوا بەڵام لەلایەن پاسەوانی سنووری تورکیا تەقەیان لێکرا.

 

- لە باشووری کوردستانیش؛ لە هەولێر، سلێمانی، کەرکووک، دهۆک، زاخۆ و دەربەندیخان و شارەکانی دیکەی کوردستان خۆپیشاندانی فراوان دەکرێت. لە هەولێر هەزاران هاونیشتمانی لە دوێنێ شەوەوە تا ئێستا چوونەتە بەردەم باڵیۆزخانەی ئەمریکا و داوا دەکەن ئەمریکا هەڵوێستی هەبێت و فشار بکاتە سەر دەوڵەتی سووریا بۆ ڕاگرتنی هێرشەکان.

 

- خۆپشاندەران پەیامیان ئاراستەی کۆنسوڵ، نوێنەری و وڵاتان و کۆمەڵگەی نێودەوڵەتی کرد، هەرچی زووە هێرشەکانی سوپای عەرەبیی سووریا بۆسەر ناوچەکانی ڕۆژئاوای کوردستان ڕابگیرێت.

 

-بۆ هەمان مەبەست ڕەوەندی کوردی لە بەریتانیا و کوردانی ئەڵمانیا بۆ پیشاندانی هەڵوێستێکی نەتەوەیی و یەکگرتوو خۆپیشاندانی ناڕەزاییان ئەنجام دا.

 

زانیاریی زیاتر: لە ڕۆژئاوای کوردستان هێرش بۆ سەر کۆبانێ و حەسەکە بەردەوامە. هەسەدە دەڵێت، توانیویانە سەرجەم هێرشەکان تێکبشکێنن.

لەلایەکی دیکەوە؛ ناوەندی ڕاگەیاندنی هەسەدە لە ڕاگەیێنراوێکدا ئاشکرای کرد: "بەهۆی بێباکیی نێودەوڵەتیی بەرامبەر بە پرسی داعش و شکستهێنانیان لە ئەستۆگرتنی بەرپرسیارێتیی، هێزەکانمان ناچار بوون لە کەمپی هۆل بکشێنەوە و لە دەوروبەری ئەو شارانە جێگیر ببنەوە کە ڕووبەڕووی هەڕەشەی گەورە بوونەتەوە".

 

-کەمپی هۆل 37 هەزار کەسی تێدایە ئەوان هەموویان خێزانی چەکدارانی داعشن.

 

ئەوەی پێویستە بیزانیت: ئیلهام ئەحمەد، بەرپرسی فەرمانگەی پەیوەندییەکانی دەرەوە لە ئیدارەی خۆسەر بە ئاڤای ڕاگەیاند: "هێرشێکی سەخت دەستیپێکردووە و سوپای عەرەبیی سووریا پابەندی ئاگربەست نەبووە؛ ئێستا شەڕ گەیشتووەتە ڕێگای نێوان شەدادی و حەسەکە و گوندەکانی کۆبانی".