وەزارەتی بەرگریی سووریا: ناچینە ناو شار و گوندە کوردییەکان

ئاڤا نیوز

وەزارەتی بەرگریی سووریا ئامادەیی تەواوی خۆی بۆ وەرگرتنی کەمپی هۆل و سەرجەم زیندانەکانی داعش لە ناوچەکە ڕاگەیاند و بەڵێنی دا کە هێزەکانی سوپا ناچنە ناو گوند و شارۆچکە کوردییەکان. 

 

ڕاگەیێنراوی فەرمی: وەزارەتی بەرگریی سووریا بڵاوی کردەوە: هێزەکانیان بە هیچ شێوەیەک نایەنە ناو ئەو ناوچە نیشتەجێبوونانەی تایبەتن بە پێکهاتەی کورد، بەڵکو کار دەکەن بۆ دابینکردنی ژینگەیەکی ئارام بۆ هەمووان و ڕێگریکردن لە هەر هەوڵێک کە ئاسایشی ناوچەکە بخاتە مەترسییەوە، تاوەکوو ڕێگری لە دووبارە ڕێکخستنەوەی تیرۆریستان بگیریێت.

 

-وەزارەتی بەرگریی سووریا: "پاراستنی ئاسایشی کوردانی سووریا پابەندییەکی ڕەهای دەوڵەتە و ڕێگە نادەن دۆسیەی زیندانییەکان وەک "بارمتە" یان کارتی گوشاری سیاسی لەلایەن سەرکردایەتیی هەسەدەوە بۆ دروستکردنی پشێوی و تێکدانی سەقامگیری بەکاربهێنرێت".

 

- "بەرەنگاربوونەوەی داعش کاری لەپێشینەی سەرەکیی حکومەتە، بۆیە داوا لە هەسەدە دەکەن بەپەلە پابەندی بەڵێنەکانیان بن و ڕێککەوتنی 18 کانوونی دووەم جێبەجێ بکەن. سوپا قەڵغانی هەموو سوورییەکانە و ئامانجی تەنیا گەڕاندنەوەی ئارامی و پاراستنی دامەزراوە حکومییەکانە".

 

لەلایەکی دیکەوە؛ ناوەندی ڕاگەیاندنی هەسەدە لە ڕاگەیێنراوێکدا ئاشکرای کرد: "بەهۆی بێباکیی نێودەوڵەتیی بەرامبەر بە پرسی داعش و شکستهێنانیان لە ئەستۆگرتنی بەرپرسیارێتیی، هێزەکانمان ناچار بوون لە کەمپی هۆل بکشێنەوە و لە دەوروبەری ئەو شارانە جێگیر ببنەوە کە ڕووبەڕووی هەڕەشەی گەورە بوونەتەوە".