ئیمانوێل ماکرۆن لە داڤۆس: "جەنگ بووەتە شتێکی ئاسایی"

ئاڤا نیوز

 

ئیمانوێل ماکرۆن، سەرۆک کۆماری فەڕەنسا، لە گوتارەکەیدا لە کۆڕبەندی ئابووریی جیهانی لە داڤۆس، تیشکی خستە سەر ناسەقامگیریی دۆخی جیهان و وتی: "جەنگ بووەتە شتێکی ئاسایی".

 

چیرۆکی سەرەکی: فەڕەنسا یەکێکە لە وڵاتە زلهێزەکانی جیهان و خاوەنی ئابوورییەکی بەهێزە لە کیشوەری ئەوروپا، چاوەڕێ دەکرا لە وتاری ئیمانوێل ماکرۆن، سەرۆک کۆماری فەڕەنسا، هەڵوێست و بابەتی یەکلاکەرەوە لەبارەی ناکۆکییەکانی جیهان بخرایەتەڕوو، بەڵام لە وتارەکەی ئەمڕۆیدا لە کۆڕبەندی جیهانی داڤۆس وتی: "ئێستا کاتی ئاشتی، سەقامگیری و پێشبینیکردنە"، ئەم قسەیە بووە هۆی پێکەنین لەناو هۆڵەکەدا، چونکە دۆخی ڕاستەقینەی ئەوروپا و بەشێکی زۆری وڵاتانی جیهان پێچەوانەی ئەو دەربڕینەیە.

 

ماکرۆن لە وتارەکەیدا ئەمانەشی وت:
-ئێمە گەیشتووینەتە قۆناغی "ناھاوسەنگی و ناسەقامگیری" لە ڕووی ئەمنی و ئابوورییەوە.

 

-ئێستا "ململانێ و جەنگ بووەتە شتێکی ئاسایی" لە جیهاندا.

 

-ئەو جەنگانەی لە 2024ەوە لە جیهاندا ڕوو دەدەن "وەرچەرخانێکن بەرەو ئۆتۆکراسی (تاکڕەویی)".

 

-دەبێت وڵاتان وانەکانی جەنگی جیهانی دووەم لەبیر نەکەن و هاوکاریی یەکتریی بکەن، چونکە ئەو وانانە هێشتا ساڵانێکی زۆری بەسەردا تێنەپەڕیوە.

 

-فەڕەنسا بڕیاری داوە بەشداریی لە مانۆڕە سەربازییەکان لە گرینلاند بکات، بەبێ ئەوەی ببنە هەڕەشە لەسەر هیچ وڵاتێک، بەڵکو تەنها پشتگیری لە دانیمارک دەکەن وەکو هاوپەیمانێکی یەکیتیی ئەوروپا.

 

باکگراوند: کیشوەری ئەوروپا لەبەردەم ئاڵنگاریی زۆر گەورەدایە، بەتایبەتی ئەوەی پەیوەندیی بە جەنگی ئۆکرانیا و ئاسایشی وزە و ناکۆکییەکان هەیە لەگەڵ ڕووسیا، هەروەها ناکۆکییەکان هەیە لەگەڵ ئەمریکا بۆ خاوەندارێتی گرینلاند لە بەستەڵەکی باکووری گۆی زەوی کە بەشێکە لە خاکی دانیمارک و دۆناڵد ترەمپ، سەرۆکی ئەمریکا خواستی وڵاتەکەی نیشانداوە بۆ دەستگرتن بەسەریدا و وڵاتانی ئەوروپا بڕیاریانداوە ڕێگریی لەو پلانە بکەن.