سەرۆکایەتیی کۆماری سووریا: لەگەڵ هەسەدە لەبارەی ئایندەی حەسەکە گەیشتینە ڕێککەوتن

ئاڤا نیوز

سەرۆکایەتیی کۆماری سووریا ڕایگەیاند، لەگەڵ هەسەدە لەسەر نەخشەڕێگەیەک بۆ ئایندەی پارێزگای حەسەکە ڕێککەوتوون، کە تێیدا مۆڵەتی 4 ڕۆژ بۆ داڕشتنی وردەکارییەکانی تێکەڵکردنەوەی ناوچەکان دیاری کراوە.

 

ڕاگەیێنراوی فەرمی: بەگوێرەی ڕاگەیێنراوی سەرۆکایەتی کۆماری سووریا، بەپێی ئەم لێکتێگەیشتنە، سوپای سووریا ناچێتە ناو ناوەندی شارەکانی حەسەکە و قامیشلۆ و گوندە کوردییەکان، بەڵکو تەنیا هێزە ناوخۆییەکانی ئەو ناوچانە ئاسایش دەپارێزن تاوەکو ڕێگری لە هەر گرژییەکی نوێ بگیریێت.

 

- لە چوارچێوەی ئەم ڕێککەوتنەدا، مەزڵووم عەبدی کاندیدێک بۆ پۆستی یاریدەدەری وەزیری بەرگری و یەکێکی دیکە بۆ پۆستی پارێزگاری حەسەکە پێشنیاز دەکات، هاوکات سەرجەم هێزە سەربازی و ئەمنییەکانی هەسەدە دەخرێنە ناو وەزارەتەکانی بەرگری و ناوخۆی سووریا.

 

ئەوەی پێویستە بیزانیت: هەروەها بڕیار دراوە مەرسوومی ژمارە 13 بۆ جێگیرکردنی مافە زمانی و کولتوورییەکانی پێکهاتەی کورد جێبەجێ بکرێت. جێبەجێکردنی ئەم تێگەیشتنە نوێیە لە کاتژمێر 8:00ـی ئێوارەی ئەمڕۆ سێشەممە دەستپێدەکات، کە ئامانج لێی گەرەنتیی مافی پێکهاتەکان و پاراستنی یەکپارچەیی خاکی سووریایە لە ڕێگەی شەراکەتێکی نیشتمانیی ڕاستەقینەوە، تاوەکو کۆتایی بە ململانێ چەکدارییەکان بهێنرێت و سەقامگیریی هەمیشەیی بۆ ناوچەکە بگەڕێتەوە.