سوودانی بە بەشداری پێشمەرگە سەرپەرشتی کۆبوونەوەیەکی بەپەلە دەکات

ئاڤا نیوز

بەئامادەبوونی نوێنەرایەتی هەرێمی کوردستان و سەرۆکی ئەرکانی هێزەکانی پێشمەرگە، محەممەد شیاع سوودانی، سەرۆکوەزیرانی عێراق و فەرماندەی گشتیی هێزە چەکدارەکان، لە بەغدا سەرپەرشتی کۆبوونەوەیەکی ئەمنی نائاسایی تایبەت بە پێشهاتەکانی سووریا دەکات.

لێدوانی فەرمی: محەممەد شیاع سوودانی، سەرۆکوەزیرانی عێراق، ڕایگەیاند، سنوورە نێودەوڵەتییەکانی عێراق، بەتایبەت لەگەڵ وڵاتی سووریا، بە تەواوی کۆنترۆڵ کراون و هێزە ئەمنییەکان لەوپەڕی ئامادەباشیدان بۆ بەرپەرچدانەوەی هەر هەوڵێکی دزەکردن بۆ ناو خاکی عێراق. 

سوودانی دەشڵێت: "وەک بەشێک لە پلانی هاوبەش بۆ پاراستنی سەقامگیری عێراق و سنورەکانی،  فەرماندەی گشتیی هێزە چەکدارەکان، پشتیوانی خۆی بۆ دابینکردنی پێداویستییەکانی هێزە جێگیرکراوەکانی سەر سنوور و هێزەکانی پێشمەرگەی کوردستان دەربڕی."

 

زانیاریی زیاتر: بەگوێرەی قسەکانی سوودانی لە کۆبوونەوەکەدا، جەخت لە گرنگیی پاراستنی سەقامگیری لە سووریا کرایەوە، داوا لە کۆمەڵگەی نێودەوڵەتی و وڵاتانی عەرەبی کراوە هەوڵەکانیان بۆ ڕاگرتنی توندوتیژییەکان چڕ بکەنەوە، هاوکات هۆشداری لە پێویستی کۆنترۆڵکردنی زیندانەکانی سووریا درا و داوای ڕێگریکردن لە هەڵهاتنی ئەندامانی گروپە تیرۆریستییەکان کرا.