گەڕاندنەوەی پەنابەرانی کوردستان لە لیبیا بەهۆی نالەباریی کەشوهەواوە دوادەخرێت

ئاڤا نیوز

 

نالەباریی کەشوهەوا گەشتی گەڕانەوەی یەکەم کاروانی کۆچبەرانی کورد لە لیبیاوە بۆ هەولێر، بۆ ماوەی 24 کاتژمێر دواخست.

 

بۆچی گرنگە: ئەم پرۆسەیە کۆتایی بە چاوەڕوانیی 208 کۆچبەری هەرێمی کوردستان دەهێنێت کە زۆربەیان خەڵکی دەڤەری ڕانیەن و ماوەیەکە لە لیبیا گیریان خواردووە. پرۆسەکە بە هەماهەنگی نێوان هەولێر و بەغدا بەڕێوە دەچێت.

 

لێدوانی فەرمی: ئەحمەد سەحاف، هەڵسوڕێنەری باڵیۆزخانەی عێراق لە لیبیا ڕایگەیاند، بەهۆی خراپی دۆخی کەشوهەواوە، ئەو گەشتەی بڕیاربوو ئەمڕۆ (چوارشەممە) ئەنجام بدرێت، بۆ سبەی پێنجشەممە دواخرا. حکومەتی عێراق بە فەرمانی سەرۆکوەزیران دوو فڕۆکەی سەربازی بۆ گواستنەوەکە تەرخان کردووە.

 

ژمارەکان وا دەڵێن: 208  کۆچبەر دەگەڕێنرێنەوە. بڕیار بوو پرۆسەکە لە ڕۆژانی 21 و 22ـی ئەم مانگە (کانوونی دووەم) بەڕێوە بچێت.

 

ئەوەی لەبارەیەوە دەگوترێت: سەلیم پاشا، لە فەرمانگەی پەیوەندییەکانی دەرەوەی حکومەتی هەرێمی کوردستان بە ئاڤا نیوزی ڕاگەیاند: "تەواوی تێچووی پرۆسەی گەڕانەوەی ئەم کۆچبەرانە لەسەر ئەرکی حکومەتی هەرێمی کوردستان دەبێت."