مەسرور بارزانی و شاندێکی شانشینی بەحرەین: دەبێت مافی کورد لە سووریا پارێزراو بێت

ئاڤا نیوز

 

مەسرور بارزانی، سەرۆکوەزیرانی هەرێمی کوردستان، لە چوارچێوەی زنجیرە دیدارەکانی لەگەڵ سەرۆک و سیاسەتمەندارانی وڵاتان لە داڤۆسی سویسڕا، لەگەڵ شاندێکی شانشینی بەحرەین کۆبووەوە، باسی دۆخی گشتیی عێراق و پەرەسەندنە سەربازییەکانی سووریا کرا.

چیرۆکی سەرەکی: ئەمڕۆ چوارشەممە، مەسرور بارزانی، سەرۆکوەزیرانی هەرێمی کوردستان، لە داڤۆس، لەگەڵ کۆمەڵێک سەرمایەداریی گەورەی کوردستان و شاندی حکومەتی هەرێم بەشداری لە 56ـمین کۆڕبەندی داڤۆس کرد و کار لەسەر پەرەپێدانی سەرجەم پەیوەندییەکانی دەکات.

زانیاریی زیاتر: مەسرور بارزانی، سەرۆکوەزیرانی هەرێمی کوردستان، لەگەڵ شاندێکی شانشینی بەحرەین کۆبووەوە شاندەکە پێکهاتبوو لە شازادە عیسا بن سەلمان ئال خەلیفە، نوێنەریی شا و وەزیری دیوانی سەرۆک وەزیران، شێخ سەلمان بن خەلیفە ئال خەلیفە، وەزیری دارایی و ئابووری نیشتمانی و عەبدوڵڵا عادل فەخرۆ، وەزیری پیشەسازی و بازرگانی.


لە کۆبوونەوەکەدا جەخت لە پێشخستنی زیاتری پەیوەندییەکانی هەرێمی کوردستان و شانشینی بەحرەین لە هەموو بوارەکاندا کرایەوە. دواتر دۆخی گشتیی عێراق و ئاڵۆزی و پەرەسەندنە سەربازییەکانی سووریا، بەشێکی دیکەی گفتوگۆکان بوو. هەردوولا ئاماژەیان بە گرنگیی پاراستنی ئاشتی، سەقامگیریی، کۆتاییهێنان بە گرژییەکان،  ڕێزگرتن لە مافەکانی گەلی کورد و پێکهاتەکانی دیکەی سووریا کردەوە.