هەسەدە: دوای ئاگربەست سوپای سووریا هەشت جار هێرشی کردووەتە سەرمان

ئاڤا نیوز

پاش تێپەڕبوونی کەمتر لە 24 کاتژمێر لە ئاگربەستەکەی نێوان هەسەدە و حکومەتی دیمەشق، هەسەدە دەڵێت سوپای عەرەبی سووریا هەشت جار و لە شەش شوێن ئاگربەستی پێشێلکردووە.

چیرۆکی سەرەکی: دوێنێ سێشەممە، سەرۆکایەتی کۆماری سووریا ڕایگەیاند، لەگەڵ مەزڵووم عەبدی گەشتینە لێکتێگەیشتنی هاوبەش بۆ جێبەجێکردنی ڕێککەوتنەکەیان و لە کاتژمێر هەشتی شەویشەوە شەڕ دەوەستێت، هەسەدەش وتی، باشە ئێمەش پابەندین و شەڕ دەوەستێنین.

ڕاگەیێنراوی فەرمی: هەسەدە دەڵێت، سوپای سووریا هەشت جار و لە شەش شوێن ئاگربەستی پێشێلکرد.

٠ کاتژمێر 8:10 خەلەکی شەو، واتا 10 خولەک دوای ئاگربەست، سوپای عەرەبی سووریا شارۆچکەی زرکانی باکووری حەسەکەیان تۆپباران کرد، تۆپبارانەکە بۆ ماوەی زیاتر لە کاتژمێرێک بەردەوام بوو.

٠ کاتژمێر 8:20 خولەک گرووپە چەکدارەکان بە چەکی قورس هێرشیان کردە سەر گوندی تەل باروود کە دەکەوێتە سەر ڕێگای ئەبیەز لە باشووری حەسەکە.

٠ هەر دوێنێ شەو کاتژمێر 8:20 خولەک، سوپای عەرەبی سووریا بە درۆن پێنج جار بۆردوومانی زیندانی ئەقتانی کردووە لە ڕەققە، شەڕڤانێک بریندار بووە.

٠ کاتژمێر 12:37 خولەکی شەویش، سوپای عەرەبی سووریا بۆردوومانی بنکەیەکی ئەمنی کردووە لە گوندی عوێجەی قامیشلۆ، لەگەڵ تەقینەوەی ماتۆڕسکیلێک بۆ سەر گەراجێکی نەخۆشخانەی دڵ و چاو هەر لە قامیشلۆ، لە هێرشەکان تەنها زیانی ماددی هەبووە.

٠ کاتژمێر 11:30 خولەکی پێشنیوەڕۆی ئەمڕۆ، سوپای عەرەبی سووریا هێرشیان کردووەتە سەر هێزەکانمان لە دەوروبەری شاری سرین، هێرشەکەمان تێکشکاندووە.

هەسەدە، دەڵێت، هێزەکانی دیمەشق بە پشتیوانیی تورکیا ئاو و کارەبایان لە شارۆچکەكە بڕیوە و بە تەواوی گەمارۆی شارۆچکەکەیان داوە .

٠ کاتژمێر 11:45 خولەک، کاروانێکی سەربازیی سەر بە گرووپە چەکدارەکان هێرشی کردووەتە سەرمان لە گوندی باسل لەسەر ڕێگای ئەبیەز  لە باشووری حەسەکە.

٠ کاتژمێر 2:10 خولەکی پاشنیوەڕۆی ئەمڕۆ سوپای عەرەبی سووریا هێرشێکی تریان کرد لە دەوروبەری شاری سرین لە باشووری کۆبانی، ئەم هێرشەشمان تێکشکاندووە.

٠ کاتژمێر 2:45 خولەک بە چەکی قورس گوندی حەمدوونی باشووری کۆبانییان تۆپباران کردووە، بەهۆیەوە ئافرەتێک شەهید بووە.