لە بەغدا گۆڕینی کاتەکانی دەوام کاریگەری لەسەر کەمبوونەوەی قەرەباڵخی شەقامەکان نەکردووە

ئاڤا نیوز

ئەنجوومەنی وەزیرانی عێراق بەمەبەستی کەمبوونەوەی قەرەباڵخی کاتەکانی دەوامی فەرمانبەرانی بەشێوەی ئەزموونی بۆ ماوەی سێ مانگ گۆڕیوە، بەڵام تاوەکو ئێستا قەرەباڵخی کەم نەبووەتەوە. 

 

ئەوەی پێویستە بیزانیت: گۆرانکاری کاتەکانی دەوام بەمشێوەیەن، یەکەم کاتژمێر 07:00ـی بەیانی بۆ 02:00ـی پاشنیوەڕۆ، یان کاتژمێر 08:00 بۆ 03:00ـی پاشنیوەڕۆ، یان کاتژمێر 09:00ـی بەیانی بۆ کاتژمێر 04:00ـی پاشنیوەڕۆ، یان کاتژمێر 10:00 بۆ 06:00 ئێوارە.

هۆکارە زانراوەکان: ئەم بڕیارەی ئەنجوومەنی وەزیرانی عێراق بۆ کەمکردنەوەی قەرەباڵخی شەقامەکانە، بەتایبەتیش لە بەغدا.

کاریگەری و لێکەوتەکان: بەگوتەی دانیشتووانی بەغدا، لە یەکەم ڕۆژی دەوام بە پلانە تازەکە، قەرەباڵخی شەقامەکان زیاتر بووە نەک کەمتر، هەر لە کاتژێر 07:00ـی بەیانییەوە قەرەباڵخی لە شەقامە سەرەکییەکان دروست بووە، پشێویشی لەکارکردن لە فەرمانگەکان دروست کردووە.

لێدوانی فەرمی: سامر سەعدی، فەرمانبەر لە وەزارەتی خوێندنی باڵای عێراقە بە ئاڤا نیوزی ڕاگەیاند، بەشێکی زۆر لە فەرمانبەران نیگەرانیی خۆیان لە گۆڕانکاری کاتەکانی دەوام دەربڕیوە، پێی وایە کاریگەری لەسەر کەمکردنەوەی قەرەباڵخی شەقامەکان نەبووە، داوا دەکات حکومەت لەو بڕیارەی پاشگەز ببێتەوە.