لە شێخان دژی هێرشەکەی ئێران بۆ سەر هەولێر خۆپیشاندان كرا

ئاڤا دیجیتاڵ

 

وەک تەواوی شارو شارۆچکەکانی کوردستان، کوردستانیانی تاراوگە و دەرەوەی وڵات، دانیشتوانی شێخان هێرشەکەی ئێران بە مووشەکی بالیستیك بۆ سەر هەولێر و بە ئامانجگرتنی هاووڵاتیانی سڤیل، سەركۆنە دەکەن.

چیرۆكی سەرەكی: ئەمڕۆ چوارشەممە(24ی کانوونی دووەمی 2024)، دژی هێرشە مووشەکییەکانی سووپای پاسدارانی ئێرانی بۆ سەر شاری هەولێر و شەهیدکردنی هاووڵاتیانی سڤیل، هاووڵاتیانی شێخان رژانە سەر شەقامەکان و هێرشەکەی ئێرانیان سەركۆنە کرد.

باكگراوند: کاتژمێر 11:30 شەوی دووشەممە، 15ـ01-2024، سووپای پاسدارانی ئێران، بە پاساوی بوونی بنکەیەکی ئیسرائیلی لە هەولێر کە دواتر ئەنجوومەنی ئاسایشی هەرێمی کوردستان تۆمەتەکەی رەتکردەوە، بە چەند مووشەکێکی بالیستیك ماڵی هاووڵاتیی پێشڕەو دزەیی، کە گەورە بازرگانێکی هەرێمی کوردستانە کردە ئامانج و بەهۆیەوە پێنج هاووڵاتیی گیانیان لەدەستدا و شەش هاووڵاتیی دیکەش برینداربوون، کە زۆرینەیان ئەندامانی خێزانی پێشڕەو دەزەیین.