ئێران: ڕێز لە ئیرادەی گەلی عێراق دەگرین

ئاڤا نیوز

ئیسماعیل بەقائی، وتەبێژی وەزارەتی دەرەوەی ئێران ڕایگەیاند کە وڵاتەکەی ڕێز لە بڕیاری عێراقییەکان بۆ دیاریکردنی حوکمڕانی دەگرێت و هێزەکانیشیان لەوپەڕی ئامادەباشیدان بۆ وەڵامدانەوەی هەر هێرشێکی ئەمریکا.

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران ڕایگەیاند: دیاریکردنی شێوازی حوکمڕانی و هەڵبژاردنی سەرۆکوەزیران تەنیا مافی گەلی عێراقە؛ بەپێچەوانەی ئەمریکاوە ئێمە ڕێز لە ئیرادەی عێراقییەکان دەگرین و متمانەمان بە بڕیارەکانی بەغدا هەیە، بەڵام نیگەرانین لایەنە دەرەکییەکان بارگرانیی نوێ بۆ ناوچەکە دروست بکەن.

لەلایەکی دیکەوە: تاران بە وردیی چاودێریی پڕۆسەی گواستنەوەی هەزاران زیندانیی داعش لە سووریاوە بۆ ناو خاکی عێراق دەکات و هۆشداریی دەدات کە نابێت دەستێوەردانی دەرەکیی ببێتە هۆی دروستکردنی بۆشایی ئەمنیی نوێ لە ناوچەکەدا؛ بەقائی جەختی لەوە کردەوە کە خوێنی هەردوو گەلی ئێرانیی و عێراقیی لە شەڕی تێرۆردا تێکەڵ بووە و ئەمە بنەمایەکی بەهێزە بۆ پاراستنی پەیوەندییەکان و ڕێگە نادرێت هیچ بابەتێک زیان بەم هاوبەشییە بگەیەنێت.

٠ هاوکات لە وەڵامی هەڕەشە سەربازییەکانی ئەم دواییەی ئیدارەی ترەمپ، وتەبێژەکەی وەزارەتی دەرەوە ڕایگەیاند کە هێزە چەکدارەکانیان لە "ئەوپەڕی ئامادەباشیدان" بۆ تێپەڕاندنی هەر مەترسییەک و وەڵامدانەوەی هەر جووڵەیەکی دوژمنکارانە کە ئاسایشی خاکی ئێران و بەرژەوەندییەکانی لە ناوچەکەدا بکاتە ئامانج.