یەحیا ڕەسووڵ: نامانەوێت لە عێراقەوە هێرش بکرێتە سەر وڵاتانی دراوسێ

ئاڤا نیوز

 

یەحیا ڕەسووڵ، گوتەبێژی فەرماندەی گشتیی هێزە چەکدارەکانی عێراق لە پانێلێکی دیداری سلێمانیدا گوتی: "نامانەوێت لە عێراقەوە هێرش بکرێتە سەر وڵاتانی دراوسێ، کاریش بۆ کۆتاییهێنان بە ئەرکی هاوپەیمانان دەکەین".

 

لێدوانی فەرمی: یەحیا ڕەسووڵ، گوتەبێژی فەرماندەی گشتی ھێزە چەکدارەکانی عێراق لە پانێلێکی دیداری سلێمانیدا ڕایگەیاند: لە ڕوانگەی ئێمەوە ئەرکی هاوپەیمانان لە عێراق لە دوای داعش کۆتایی هاتووە، لەگەڵ ئەوەشدا دەمانەوێت پەیوەندی دووقۆڵیمان لەگەڵ ئەمریکا و بەریتانیا هەبێت.

زانیاریی زیاتر: حکومەتی عێراق لە ڕێی دیپلۆماسی و دانوستانەوە توانی سەرکەوتن بەدەست بێنێت لە ڕاگرتنی هێرشەکان لەناو خاکی عێراقدا و ئەم بابەتە کۆتایی هاتووە، نامانەوێت عێراق ببێتە گۆڕەپانی یەکلاکردنەوەی ململانێکان، ناشمانەوێت لە خاکی ئێمەوە هیچ هێرشێک بۆ سەر وڵاتێکی دراوسێ بکرێت. یەحیا ڕەسووڵ ئەمەی گوتووە.

گۆشەیەکی دیکەی دیمەنەکە: حەشدی شەعبی لە پەرلەمانەوە دەنگی لەسەر دراوە، نایشارینەوە کە گرووپی چەکداری لە عێراق هەیە.

ئەوەی پێویستە بیزانیت: پێشتر عەبدولعەزیز محەممەداوی ناوسراو بە "ئەبو فەدەک"، کە سەرۆک ئەرکانی دەستەی حەشدی شەعبی عێراقە ڕایگەیاند: حەشدی شەعبی چاوەڕێی فەرمانی عەلی خامنەیین، بۆ وەڵامدانەوەی ئیسرائیل.