گەمارۆدانی کۆبانێ بەردەوامە و ژیانی 600 هەزار هاووڵاتی لە مەترسیدایە

ئاڤا نیوز

زیاتر لە 21 ڕۆژە شاری کۆبانێ لەلایەن چەکدارانی حکومەتی سووریا ڕووبەڕووی گەمارۆیەکی قوورس بووەتەوە، ژیانی سەدان هەزار هاووڵاتی و ئاوارە لە مەترسیدایە و شارەکەش لە هەموو جۆرە پێداویستییەکی سەرەتایی ژیان بێبەش کراون.

لێدوانی فەرمی: ڕەدوان بێزار، پەیامنێری ئاڤا لە کۆبانێ دەڵێت: "بەهۆی ئەو گەمارۆیەوە، تایبەت لەناو ئاوارەکان، نەخۆشی جۆراو جۆر بڵاوبووەتەوە، گومان هەیە نەخۆشی کۆلێراش لەناو خەڵک بڵاوبووبێتەوە، لەگەڵ ئەوەی ئەمڕۆ شاندێکی ئاسایشی دیمەشق و ئاسایشی ناوخۆی کۆبانێ کۆدەبنەوە بۆ ئەوەی گەمارۆی سەر کۆبانێ هەڵبگرن." 

زانیاریی زیاتر: بەهۆی گەمارۆکەوە، بارودۆخی ژیان و ڕەوشی کەرتی تەندروستی لە ناو شاری کۆبانێ ڕووبەڕووی ئاستەنگی زۆر بوەتەوە. شارەکە بەهۆی تەواوبوونی دەرمان، شیری منداڵ و ماددە خۆراکییە سەرەکییەکانەوە دەناڵێنێت، هاوکات لەگەڵ ئەو سەرما توندەدا، شارەکە بێبەشکراوە لە سووتەمەنی بۆ گەرمکردنەوە، هاوکات کارەبا و ئەنتەرنێت بە تەواوەتی لە شارەکە پچڕاون. 

ژمارەکان وادەڵێن: شاری کۆبانێ ئێستا تەنیا دانیشتووانی خۆی تێدا نییە، بەڵکو زیاتر لە 200 هەزار ئاوارە لەوێدا هەن و  لە 70 ناوەندی جیاوازدا جێگیر کراون. واتە نزیکەی 600 هەزار کەس لە دانیشتووان و ئاوارە، کە بەهۆی هێرشەکانی ئەم دواییەوە پەنایان بۆ کۆبانێ هێناوە، لە ژێر ئەم گەمارۆیەدان و  ڕووبەڕووی مەترسیی برسییەتی و نەخۆشی جۆراوجۆر بوونەتەوە.

ئەوەی پێویستە بیزانیت: بەگوێرەی سەرچاوەکان، ڕۆژی یەکشەممەی ڕابردوو، هێزەکانی ئاسایشی ناوخۆی کۆبانێ لەگەڵ هێزە ئەمنییەکانی شاری حەلەب کۆبوونەوە، لە کۆبوونەوەکە جەخت لەسەر هەڵگرتنی گەمارۆی سەر کۆبانێ کرایەوە، بەڵام تا ئەم ساتە هیچ هەنگاوێکی کرداریی نەنراوە، ئەمەش گومانی لای چاودێران دروست کردووە لەسەر نیازمەندی لایەنی بەرامبەر بۆ جێبەجێکردنی بەڵێنەکانیان.