پزیشکیان: ئێران ئامادەی دانوستانی "بردنەوە بە بردنەوە"ـیە لەسەر دۆسیەی ئەتۆمی

ئاڤا نیوز

مەسعوود پزیشکیان، سەرۆککۆماری ئێران ڕایگەیاند: تاران پێشوازی لە هەر دانوستانێک دەکات کە لەسەر بنەمای یەکسانی و هاوسەنگی بەرژەوەندییەکان "بردنەوە بە بردنەوە" بێت و ڕێگەی دایالۆگ عاقڵانەیە بۆ چارەسەرکردنی ئاستەنگییەکانی ناوچەکە.

چیرۆکی سەرەکی: دوای کۆتایهاتنی کۆبوونەوە دوو قۆڵییەکەی نێوان شاندی ئێران و ئەمریکا لە مەسقەت، سەرۆککۆماری ئێران ڕایدەگەیێنێت، کۆبوونەوە و  گفتوگۆکان کاتێک بەرهەمدار دەبێت کە لەسەر بنەمای بەرژەوەندی هەردوولایەن بێت و ئامادەن بۆ دانوستانی "بردنەوە بە بردنەوە."

لێدوانی فەرمی: مەسعوود پزیشکیان، سەرۆککۆماری ئێران، لە نوێترین لێدوانی بۆ یەکێک لە کەناڵەکانی وڵاتەکەی وتی: "خولی نوێی دانوستانە ئەتۆمییەکان، بە تایبەت بە پاڵپشتی وڵاتانی دراوسێ، دەرفەتێکی زێڕینە بۆ گەیشتن بە چارەسەرێکی دادپەروەرانە."

پزیشکیان دەشڵێت: "دانوستان لە کاتێکدا سەرکەوتوو دەبێت کە لایەنە بەشداربووەکان بەبێ زیادەڕەوی پابەندی بەڵێنەکانیان بن و مافە ڕەواکانی ئێران لەبەرچاو بگیرێت و سزا ئابورییەکان لەسەر گەلی ئێران هەڵبگیرێن."

٠ دایالۆگ و دانوستان تەنیا ڕێگەی عەقڵانییە بۆ چارەسەرکردنی ئاستەنگی ناوچەیی و جیهانی.

٠ کێشەکان تەنیا لە ڕێگەی عەقڵانییەت و دوورکەوتنەوە لە گوشاری یەکلایەنە چارەسەر دەبن بۆ زامنکردنی مافە دەستووریی و نێودەوڵەتییەکان.

باکگراوند: ڕۆژی هەینی ڕابردوو، گەڕی یەکەمی دانوستاندنەکانی نێوان ئێران و ئەمریکا، لە مەسقەتی پایتەختی سەڵتەنەتی عومان بەڕێوەچوو، بەرپرسانی ئێران ڕایانگەیاند بوو سازش لەسەر بەرنامە مووشەکییەکان ناکەن.