بەهۆی درۆنی باندەکانی ماددەی هۆشبەری مەکسیک فڕۆکەخانەی ئێل پاسۆ داخرا

ئاڤا نیوز

هێزە ئەمنییەكانی ئەمریكا ژمارەیەک درۆنی باندە مافیاکانی ماددەی هۆشبەری مەکسیکیان خستە خوارەوە، بەرپرسێکی ئەمریکیش دەڵێت: ئاسمانی وڵاتەکەمانیان بەزاندووە.

لێدوانی فەرمی: بەرپرسێکی باڵای ئەمریکا کە ناوەکەی ئاشکرا نەکراوە، بە ئاژانسی فرانس پرێسی وتووە، "کۆمەڵێک درۆنی باندە مافیاییەکانی ماددەی هۆشبەری مەکسیک سنووری ئاسمانی ئەمریکایان بەزاندووە."

ئەو بەرپرسە باڵایە دەشڵێت: هێزەکانی ئەمریکا دەستبەجێ ڕێکاری پێویستیان بۆ ڕێگریکردن و خستنەخوارەوەی درۆنەکان گرتووەتەبەر، ڕووداوەکەش بەرەبەیانی ڕۆژی چوارشەممە بە کاتی ئەمریکا ڕوویداوە.

زانیاریی زیاتر: بەهۆی بەزاندنی ئاسمانی ئەمریکاوە لەلایەن ئەو فڕۆکە بێفڕۆکەوانەوە بۆ ماوەیەک فڕۆکەخانەی 'ئێل پاسۆ' لە ویلایەتی تەکساسی ئەمریکا بۆ ڕووی گەشتیاران داخرا و گەشتە ئاسمانییەکان ڕاگیران.

ئەوەی لەبارەیەوە دەگوترێت: سەرچاوە هەواڵییەکان ئاماژە بەوە دەکەن، "سوپای ئەمریکا لە بنکەی سەربازی 'فۆرت بلیس' و فڕۆکەخانەی سەربازی 'بیگزە'وە تەکنەلۆژیای پێشکەوتووی دژەدرۆنیان بەکارهێناوە."

باکگراوند: ئیدارەی دۆناڵد ترەمپ، سەرۆکی ئەمریکا،  پێشتر هۆشداریی دابوو، کە ڕێگە بە هیچ جۆرە پێشێلکارییەک نادات بکرێتە سەر سەروەریی خاکی وڵاتەکەی؛ باندە مافیاییەکانی ماددەی هۆشبەریشی وەک ڕێکخراوی تیرۆریستی بیانی ناساندووە.