لاهیب هیگڵ: ڕۆژهەڵاتی ناوەڕاست بەرەو گۆڕانكاری گەورە دەڕوات

ئاڤا نیوز

شرۆڤەکارێک ڕایدەگەیێنێت، ڕۆژهەڵاتی ناوەڕاست بەرەو گۆڕانكاریی گەورە دەڕوات و هێرشەکەی سەر ئیسرائیل یەكێك بوو لە ڕووداوە گەورەكانی ناوچەكە.

لێدوانی فەرمی: لاهیب هیگڵ، شرۆڤەکاری باڵا بۆ کاروباری عێراق لە گرووپی قەیرانی نێودەوڵەتی، لە پانێڵێکدا لە دیداری سلێمانی ڕایگەیاند: ڕۆژهەڵاتی ناوەڕاست بەرەو گۆڕانكاری گەورەدا دەڕوات و هێرشەكەی سەر ئیسرائیل یەكێك بوو لە ڕووداوە گەورەكانی ناوچەكە.

لەلایەکی دیکەوە: لاهیب هیگڵ باسی ڕەوشی غەززەی کرد و گوتی: ماوەی شەش مانگە لەسەر کەیسی غەززە کار دەکەین، بەڕاستی وەڵامدانەوەی ئیسرائیل بۆ هێرشەکەی حەوتی ئۆکتۆبەری ساڵی ڕابردوو چاوەڕوان نەکراو بوو، بەتایبەت بۆ باکووری غەزە کە تا ئێستاش بەردەوامە.

زانیاریی زیاتر: ئێستا لە غەززە قەیرانی مرۆیی و برسیەتی سەریهەڵداوە، بەهۆی ئەوەی ئیسرائیل ناهێڵێت خۆراک، دەرمان و پێداویستیی بگاتە کەرتەکە، بە پاساوی ئەوەی هاوکارییە بۆ چەکدارانی حەماس.

ئەوەی لەبارەیەوە دەگوترێت: هیگڵ دەپرسێت ئەوەی جێی سەرنجە بۆچی بەمشێوەیە ئیسرائیل لە هێرش و گەمارۆدانی خەڵکی غەزە بەردەوامە؟ تا ئێستا هیچ لایەنێک وەڵامێکی دروست و لۆژیکی وەرنەگرتووە، تەنیا ئەوە نەبێت کە هەموو خەڵکی غەززە پشتیوانی حەماس دەکەن.