پشتیوان سادق: ئەو حیزبانەی ناویان پێشکەشی کۆمیسیۆن کردووە دەزانن بەبێ پارتی هەڵبژاردن ناکرێت

ئاڤا نیوز

ئەندامێکی مەکتەبی سیاسیی پارتی ڕایدەگەیێنێت، چارەسەرکردنی پرسی مووچە لەگەڵ حکومەتی عێراق سەرەتایەکی باشە بۆ چارەسەرکردنی کێشەکانی دیکەش.

وێنە گەورەکە: پشتیوان سادق، بەرپرسی مەکتەبی ڕێکخستنی  پارتی لە هەولێر، لە پانێڵێکدا لە دووەمین کۆنفرانسی هاوبەشی نێودەوڵەتی بۆ زانستە مرۆییەکان، باسی هەڵبژاردن، کێشەکانی نێوان هەولێر و بەغدا، پرسی مووچە و بڕیارەکانی دادگای فیدراڵی و چەند بابەتێکی دیکەی کرد.

لێدوانی فەرمی: پشتیوان سادق لەبارەی هەڵبژاردن ڕایگەیاند، سەدا 90ـی ئەو حیزبانەی ناویان پێشکەشی کۆمیسیۆن کردووە پێیانوایە بەبێ پارتی هەڵبژاردن ناکرێت. باسی ئەوەشی کرد کاتێک سەرۆکی ئەمەریکا دەڵێت دەبێت هەڵبژاردنێکی پاک و شەفاف لە هەرێمی کوردستان بکرێت، واتای ئەوە دەگەیەنێت دەستوەردان لە هەڵبژاردنی پەرلەمانی کوردستان دەکرێت. 

لەلایەکی دیکە: پشتیوان سادق لەبارەی بڕیارەکانی دادگای فیدراڵی گوتی: بڕیارەکانی دادگا 99%یان سیاسین و هیچ بنەمایەکی دەستووری و یاساییان نییە، دادگا بووەتە مەهزەلە و بە سیاسی کراوە، دەستوور لە دادگەی فیدراڵی عێراق گەورەترە، بەڵام  دەستەڵاتی دادوەری بەرامبەر بە هەرێمی کوردستان بەکاردەهێنن و دەستوور جێبەجێ ناکەن. جەختیشی کردەوە شەرمە بۆ عێراق دادگەی فیدراڵی بەمشێوەیە بەسیاسی بکرێت.