عێراقییەکان لە کڕینی خانووبەرە لە تورکیا لە پلەی چوارەمدان

ئاڤا نیوز

هاووڵاتییانی عێراقیی پلەی چوارەمیان گرتووە بۆ کڕینی خانوو و یەکەی نیشتەجێبوون لە تورکیا لەنێو هاووڵاتییانی بیانی و لەدوای هەریەکە لە هاووڵاتییانی ڕووسیا، ئێران، ئۆکراینا دێن.
 
ڕاگەیێنراوی فەرمی: دەستەی ئاماری تورکیا ڕایگەیاندووە، رێژەی فرۆشتنی خانووبەرە بۆ کەسانی بیانی لە مانگی ئازاری ئەمساڵ بە رێژەی 47.9% کەمیکردووە بە بەراورد بە هەمان مانگ لە ساڵی 2023. 
 
ئەوەی پێویستە بیزانیت: هاوڵاتییانی ڕووسیا بە کڕینی 411 خانوو یەکەمی ڕیزبەندی کڕیارانی خانووبەرەن لە تورکیا بۆ مانگی ئازاری ئەمساڵ، ئێرانییەکان لە پلەی دووەمدان بە کڕینی 182 خانوو، دواتر ئۆکراینییەکان دێن کە 129 خانوویان کڕیووە، لە پلەی چوارەمیش عێراقییەکان دێن بە کڕینی 82 خانوو.
 
زانیاری زیاتر: پارێزگای ئیستەنبوڵ یەکەمە لە فرۆشتنی یەکەی نیشتەجێبوون بە فرۆشتنی 652 خانوو، دواتر  ئەنتاڵیا دێت کە 618 خانوو و یەکەی نیشتەجێبوونی تێدا فرۆشراوە، شاری مێرسینیش 151 خانووی تێدا فرۆشراوە.
 
باکگراوند: عێراقییەکان لە ساڵی 2015ەوە لە پێشینەی وڵاتانی تر بوون بۆ کڕینی خانووبەرە لە تورکیا، بەڵام لە ساڵی 2021ەوە پاشەکشەیان کرد، ئەمەش دوای زیادبوونی هەژموونی هاووڵاتییانی ڕووسیا و ئێران لە کڕینی خانوو و یەکەی نیشتەجێبوون لە تورکیا.